Լիբիայի նախկին առաջնորդ Մուհամմար Քադաֆին հավանաբար սպանվել է ֆրանսիական գործակալի կողմից Ֆրանսիայի նախկին նախագահ Նիկոլա Սարկոզիի ցուցումով: Այս մասին հաղորդել են լիբիական իշխանությունները:
Տեղեկատվության համաձայն` 2011 թվականի հոկտեմբերի 20-ին օտարերկրյա գործակալը, խառնվելով հեղափոխականների հետ, կրակել է Քադաֆիի գլխին:
«Այն պահից սկսած, երբ Լիբիայի իրադարձություններին միջամտեց ՆԱՏՕ-ն, որին և աջակցում էր Ֆրանսիայի նախկին նախագահը, Քադաֆին սպառնաց պատմել Սարկոզիի հետ իր հարաբերությունների, մասնավորապես 2007 թվականին նրա նախընտրական քարոզարշավի բազմամիլիոնանոց ֆինանսավորման մասին»,- մեջբերում է իտալական Corriere della Sera-ն:
Հիշեցնենք, որ ապրիլի 28-ին ֆրանսիական Mediapart ինտերնետ-հրատարակչությունը հերթական նյութն էր հրապարակել Սարկոզիի և Քադաֆիի կապի մասին: Ֆրանսիայի դատախազությունը մտադիր է պարզել` Mediapart-ը կեղծված փաստաթղթեր չի՞ օգտագործել արդյոք և հրապարակել տեղեկատվություն, որը իրականությանը չի համապատասխանում:
Ավելի վաղ Բելառուսի նախագահ Ալեքսանդր Լուկաշենկոն հայտարարել էր, որ Ֆրանսիայի նախկին նախագահը Քադաֆիից 100 միլիոն դոլար է ստացել իր նախընտրական քարոզարշավի համար: Նրա խոսքով` այդ մասին իրեն անձամբ Քադաֆին է պատմել:
Հիշեցնենք, որ Լիբիայի նախկին առաջնորդը սպանվեց 2011 թվականի հոկտեմբերի 20-ին իր հայրենի Սիրթ քաղաքում:
