Ազգային ժողովի ՀՀԿ խմբակցության պատգամավոր Նահապետ Գևորգյանի («Արմավիրցի Նովո») որդու` Արտակ Գևորգյանի դեմ հարուցված քրեական գործն արդեն ուղարկվել է Արմավիրի մարզի ընդհանուր իրավասության դատարան, սակայն դատական նիստի օրը հայտնի չէ:
Հիշեցնենք, որ հուլիսի 18-ին Արտակ Գևորգյանը Արմավիրի մարզի Սարդարապատ գյուղի դպրոցի մոտ իջնելով իր վարած «ԳԱԶ 24» մակնիշի ավտոմեքենայից՝ ատրճանակի սպառնալիքով կանգնեցրել էր Վիրաբ Ա.-ի «ՎԱԶ 2106» մակնիշի ավտոմեքենան և իջեցնելով վերջինիս ու նրա ուղևորին ու թողնելով «ԳԱԶ 24» մակնիշի ավտոմեքենան` «ՎԱԶ 2106» ավտոմեքենայով հեռացել էր:
Հուլիսի 21-ին Արմավիրի մարզի ընդհանուր իրավասության դատարանի դատավոր Արամ Հովսեփյանը դռնփակ դատական նիստն անցկացնելուց հետո բավարարել էր Արմավիրի մարզի քննչական բաժնի ավագ քննիչ Արմեն Դալլաքյանի միջնորդությունը Արտակ Գևորգյանի նկատմամբ որպես խափանման միջոց կիրառել երկամսյա կալանքը, ինչից հետո վերջինս տեղափոխվել էր «Վարդաշեն» քրեակատարողական հիմնարկ:
Հիշեցնենք նաև, որ Ա. Գևորգյանին մեղադրանք է առաջադրվել ՀՀ Քրեական օրենսգրքի 183 հոդված 1-ին մաս (ավտոմեքենայի կամ տրանսպորտային այլ միջոցին ապօրինաբար տիրանալը, փախցնելը՝ առանց հափշտակելու նպատակի) և նույն հոդվածի 3-րդ մասի 3-րդ կետի (կատարվել է կյանքի կամ առողջության համար վտանգավոր բռնություն գործադրելով կամ դա գործադրելու սպառնալիքով), ինչպես նաև 235 հոդվածի (ապօրինի կերպով զենք-զինամթերք պահելը, կրելը, օգտագործելը) հատկանիշներով:
Նշենք, որ Արտակ Գևորգյանը շարունակում է մնալ կալանքի տակ: