Ամերիկյան DreamWorks կինոընկերությունը, որը հիմնադիրներից մեկը հայտնի պրոդյուսեր և ռեժիսոր Սթիվեն Սփիլբերգն է, մտադիր է ֆիլմ նկարահանել քաղաքական մերկացումներով զբաղվող WikiLeaks պորտալի հիմնադիր Ջուլիան Ասանժի մասին. հայտնում է բրիտանական The Guardian թերթը:
«WikiLeaks. ֆիլմը» (WikiLeaks: the Movie) ֆիլմի նկարահանման համար իրավունքների պատկանելիության վերաբերյալ արդեն նախնական համաձայնագիր է կնքվել: Ֆիլմի հիմքում ընկած է հունվարին լույս տեսած «WikiLeaks. Ջուլիան Ասանժի պայքարը գաղտնիության դեմ» (WikiLeaks: Inside Julian Assange’s War on Secrecy) գիրքը, որի հեղինակներն են The Guardian-ի լրագրողներ Լյուք Հարդինգը և Դևիդ Լին:
Հեղինակներն իրենց գրքում ներկայացնում են 39-ամյա Ասանժի կյանքը, որն անսպասելիորեն հանրայնացրեց բազմաթիվ գաղտնի փաստաթղթեր` Իրաքի և Աֆղանստանի մասին, ինչպես նաև ամերիկացի դիվանագետների ծառայողական նամակագրությունները: Բացի այդ, գրքում պատմվում է Ասանժի` բրիտանական հրատարակչությունների հետ համագործակցության մասին:
Ինչպես հայտնվում է հաղորդագրության մեջ, ֆիլմը, որի համար դեռ պետք է սցենարիստ, ռեժիսոր և դերասանական կազմ ընտրվի, ամենայն հավանականությամբ կնկարահանվի դետեկտիվ ժանրում:
WikiLeaks-ի շուրջ մեծ սկանդալը սկսվեց անցյալ տարվա նոյեմբերի 29-ին, երբ կայքում տեղադրվեց ԱՄՆ դիվանագիտական ծառայությունների ներքին նամակագրությունները, որոնց մեջ, մասնավորապես, շատ վատ արտահայտություններ կան համաշխարհային առաջնորդներին հասցեին:
Ինչպես հայտնվում է կայքում, 250 հազար փաստաթղթերից կազմված հավաքածուն` բաց օգտագործման համար նախատեսված, աշխարհի ամենամեծ հավաքածուն է: