«Էրեբունի» պատմահնագիտական արգելոց-թանգարանում բացվել է «Ճանապարհ. Էրեբունին երեկ և այսօր» հայ-ֆրանսիական համատեղ ցուցահանդեսը` ներկայացնելով Էրեբունի ամրոցի գիտական ուսումնասիրման ճանապարհը` հայտնաբերումից մինչ օրս: Ողջունելով ներկաներին` արգելոց-թանգարանի տնօրեն Գ. Գյուրջյանը անդրադարձել է պատմամշակութային ժառանգության պահպանության և այն հանրությանը մատչելի դարձնելու կարևորությանը:
Ցուցահանդեսի բացման արարողությանը ներկա ՀՀ-ում Ֆրանսիայի արտակարգ և լիազոր դեսպան Անրի Ռենոն առանձնակի ջերմությամբ է ողջունել Հայաստանի միացումը համաեվրոպական նախաձեռնությանը` Եվրոպական ժառանգության օրերին: Դեսպանը նշել է, որ տարեցտարի ընդլայնվող հայ-ֆրանսիական գիտամշակութային համագործակցությունը չի ավարտվում այս ցուցահանդեսով. Էրեբունիում այդ համագործակցությունը կշարունակվի ևս 4 տարի` մինչև 2015 թվականը: Նա նաև նշել է, որ թեև ցուցահանդեսը վերաբերում է Էրեբունի ամրոցին, սակայն հազարամյակների պատմություն ունեցող այդ հուշարձանը ևս մասն է կազմում եվրոպական ժառանգության: Խոսքով հանդես եկավ նաև նախիջևանագետ Արգամ Այվազյանը: Եվրոպական ժառանգության օրերի համատեքստում նա մեկ անգամ ևս բարձրաձայնեց Ջուղայի պատմական գերեզմանատան բարբարոսաբար ոչնչացման փաստը` ինչը ոչ այլ ինչ է քան եվրոպական մշակույթի աղքատացում: Գ. Գյուրջյանը շնորհակալություն հայտնեց Ա. Ռենոյին` հիշեցնելով, որ Եվրոպայի միլիոնավոր քաղաքացիներին այս համաեվրոպական տոնը պարգևել է հենց Ֆրանսիան` 1985 թվականին: Այնուհետև հյուրերն ու ներկաները դիտել են ցուցահանդեսը , որը պատրաստվել էր «Էրեբունի» արգելոց-թանգարանի և Էրեբունիում գիտահետազոտական ծրագիր իրականացնող ֆրանսիական արշավախմբի հետ համատեղ:
Եվրոպական ժառանգության օրերի շրջանակում, 10-ամյա ընդմիջումից հետո արգելոց-թանգարանը հյուրերին ներկայացրել է նաև «Էրեբունի» պատմահնագիտական արգելոց-թանգարան» եռալեզու ճանաչողական նոր գրքույկը, որն ամփոփում է ճանաչողական ակնարկներ` Էրեբունի, Թեյշեբաինի /Կարմիր բլուր/ և Շենգավիթ հնագիտական հուշարձանների վերաբերյալ:
Միաժամանակ, կարևորելով հուշարձանների պահպանության բնագավառում առաջատար և հաջողված փորձի խթանումը, թանգարանի հիմնական ցուցասրահում ցուցահանդեսի բացմանը համընթաց ցուցադրվեց «Պահպանություն հանուն ապագայի» տեսաշարը` նվիրված մշակութային ժառանգության բնագավառում Եվրոպական միություն/Եվրոպա Նոստրա-2012 մրցանկաբաշխության 28 մրցանակակիր նախագծերին: Տեսաշարը պատրաստվել է արգելոց-թանգարանի և «ԻԿՕՄՕՍ/Հայաստան» հասարակական կազմակերպության կողմից. այն տրամադրվել է մայրաքաղաքի այլ թանգարանների ևս` Օրերի եվրոպական տեսանելիությունը շեշտելու նպատակով:
