Մոսկվայի Նագատինսկի դատարանը Կամոլիդդին Համիդովին կալանավորելու որոշում է կայացրել, որը մեղադրվում է «Էխո Մոսկվիի» ու «Մայակի» լրագրող Սերգեյ Ասլանյանի վրա հարձակվելու մեջ: Այս մասին հաղորդում է Իրավական ու դատական տեղեկատվության ռուսական գործակալությունը:
«Դատարանը վճռել է 1994թ. ծնված Կամոլիդդին Համիդովի նկատմամբ որպես խափանման միջոց ընտրել ազատությունից զրկելը՝ առայժմ 28 օրով: Կալանքի ժամկետը սահմանվել է մինչև հոկտեմբերի 23-ը»,- պատմել է Gazeta.ru-ի աղբյուրը դատարանից:
Համիդովը մեղադրվում է ՌԴ Քրեական օրենսգրքի 1125-րդ հոդվածի 2-րդ մասի հատկանիշներով (առողջությանը դիտավորյալ թեթև վնաս հասցնելը՝ քաղաքական, ռասայական կամ կրոնական ատելության ու թշնամանքի պատճառով):
Դատարանը կալանավորման որոշում է կայացրել, քանի որ ավելի վաղ մեղադրյալը թաքնվել է հետաքննությունից Ղրղըզստանում:
Ինչպես ավելի վաղ տեղեկացրել էր «Առաջին լրատվական»-ը, համաձայն հետաքննության վարկածի` Ղրղըզստանի 21-ամյա քաղաքացին ստացել է լրագրող Սերգեյ Ասլանյանին սպանելու պատվեր: Ձերբակալվածը խոստովանել է, որ տուժողի հասցեն ու հեռախոսահամարը ճշտել է համացանցից, իսկ այն գրասենյակային մկրատը, որով վնասվածքներ է հասցրել Ասլանյանին, գնել է կրպակից:
Հիշեցնենք, որ լրագրողի վրա հարձակում էր իրականացվել Մոսկվայում: Բնակարանից դուրս գալիս հարվածել էին նրա գլխին ու հասցրել մկրատի 15 հարված:
Լրագրողը կարողացել էր դեպքի վայրից զանգահարել շտապօգնություն, ու նրան օգնություն են ցուցաբերել կանչով ժամանած շտապօգնության աշխատակիցները: