Հունվարի վերջին «Դանդի Փրիշս Մեթլզ» ընկերության կանադական ընկերության Բուլղարիայի և Հայաստանի պատասխանատու կառավարիչ Ռիկ Հաուզի 4-օրյա աշխատանքային այցը Կապան թերևս շատ բան փոխեց «Դինո Գոլդ Մայնինգ Քամփնիում» ։
Նախ ընկերության սեփականատերերի որոշմամբ աշխատանքից ազատվեցին գլխավոր տնօրեն Ռոբերտ Ֆալետան ու նրա կինը՝ ընկերության անվտանգության և ակտիվների պահպանության գծով մենեջեր Ֆրիդա Ֆալետան։ Ռիկի Հաուզը հանդիպեց աշխատակիցների հետ, ծանոթացավ նրանց խնդիրներին ու աշխատանքային պայմաններին։ Հանքագործները բարձրացրին գիշերավարձերի վճարումը։
Հիշեցնենք, որ «Դինո Գոլդ Մայնինգ Քամփնին» 2005թ.-ից սկսած աշխատողներին չի վճարել գիշերային, արտաժամյա և վնասակար աշխատանքի համար նախատեսված գումարները։: ՀՀ կառավարության հետ 2009թ. ձեռք բերած պայմանավորվածության համաձայն` կոմբինատն աշխատողների աշխատավարձերի պարտքերը պետք է մարեր 2009թ. հուլիսի 1-ից` մեկ տարվա ընթացքում, որը, սակայն, չի կատարել:
Ըստ հանքագործների՝ ընկերությունը վճարել է աշխատավարձերի պահանջով դատարան դիմած 17 անձից 15-ին, իսկ մյուս երկուսը դեռևս չեն վճարվել, քանի որ չեն համաձայնել ընկերության առաջարկած գումարին:
Միաժամանակ ձեռնարկության պաշտոնական տվյալներով՝ 428 մարդ է կրճատվել 2008-10թթ.-ին, և նրանցից առայժմ միայն 17-ն է դիմել դատարան` չվճարված աշխատավարձերը ստանալու պահանջով։
Ընկերության չորեքշաբթի տարածած պաշտոնական հաղորդագրությունից տեղեկանում ենք, որ «Դինո Գոլդ Մայնինգ Քամփնի» ՓԲ ընկերությունը գիշերավարձերի վերահաշվարկի գործընթացը սկսել էր դեռևս 2009թ. օգոստոս ամսից։ Մինչև 2010 հուլիսը մարվել են 2007թ. մայիսից մինչև 2008թ. սեպտեմբեր ընկած ժամանակահատվածի պարտավորությունները: 2005թ.-ից մինչև 2007թ. ապրիլ ժամանակահատվածի պարտավորությունների հաշվարկումը առավել դժվար էր էլեկտրոնային տվյալների բազայի բացակայության պատճառով, ինչի համար էլ նախատեսվածից շատ ժամանակ պահանջվեց: Ընկերությունը արդեն ավարտել է 2005թ.-ից մինչև 2007թ. ապրիլ ընկած ժամանակահատվածի գիշերավարձերի վերահաշվարկը և վճարումները կկատարվեն այս տարվա մարտ ու ապրիլ ամիսներին։
Նշենք, որ ըստ հաղորդագրության` առայժմ վճարվելու են ձեռնարկության ներկայիս աշխատողներին։ «Բոլոր ջանքերը գործադրվելու են նախկին աշխատակիցների հետ կապ հաստատելու և վճարումներն իրականացնելու համար»,- ասվում է «Դինո Գոլդ Մայնինգ Քամփնիի» տարածած մամուլի հաղորդագրության մեջ։
