Թուրքական Today’s Zaman-ը գրում է, որ Չինաստանը ձգտում է բաց երկխոսություն հաստատելու մուսուլմանական աշխարհի հետ` հույս ունենալով Չինաստանում մուսուլմանական հասարակության հետ ավելի լավ փոխգործակցություն ապահովել:
Կրոնական հարաբերությունների վարչության նախագահի տեղակալ Մեհմետ Գյորմեզը Today’s Zaman-ին տված հարցազրույցում նշել է, որ երկու շաբաթ առաջ իրականացրած այցելության ժամանակ ականատեսն է եղել չինական կողմի անկեղծ մտադրություններին` քննարկելու եւ գտնելու լուծումներ` Չինաստանում մուսուլմանական հասարակության խնդիրների համար: Պատվիրակությունը Չինաստան է մեկնել, որպեսզի քննի եւ չինական իշխանություններին ներկայացնի Իսլամական կոնֆերանս կազմակերպության (ԻԿԿ) մտահոգություններն ու առաջարկությունները` կապված այդ երկրում մուսուլմանական փոքրամասնության հետ: Բացի Թուրքիայից` ներկայացված են եղել Սուդանը, Սաուդյան Արաբիան, Քուվեյթը, Հորդանանը եւ Բոսնիա ու Հերցեգովինան:
Չինաստանն ավանդաբար լուրջ խնդիրներ ունի մուսուլմանական փոքրամասնության հետ, եւ այս խնդիրները միշտ բարձրացվում են Չինաստանի ղեկավարության եւ մուսուլմանական երկրների ղեկավարների հանդիպումների ժամանակ: Այս առումով Չինաստանը վերջերս սկսել է երկխոսության գնալ այդ երկրների հետ` այդ փոքրամասնության խնդիրները լուծելու եւ ինտեգրացիոն գործընթացներն ավելի դյուրին դարձնելու համար: Չինաստանն այս քայլով նաեւ ձգտում է չբարդացնել հարաբերությունները մուսուլմանական երկրների հետ, քանի որ կենսական շահեր ունի` այդ երկրների հետ կապված, հատկապես` այն տարածաշրջանների, որտեղից էներգակիրներ է ստանում: