Կոտայքի մարզի Արզական գյուղում այսօր գյուղապետի աթոռի համար թեժ ընտրապայքար է ընթանում ԲՀԿ-ի կողմից առաջադրված Արմեն Մելքոնյանի և ՀՀԿ-ական գործող գյուղապետ Նորիկ Մովսիսյանի միջև: Նորիկ Մովսիսյանը գյուղը ղեկավարում է արդեն 10 տարի:
«Առաջին լրատվական»-ը գյուղ կատարած այցի ժամանակ հանգստավայր հանդիսացող Արզականում մի շարք խնդիրներ արձանագրեց: «Առաջին լրատվական»-ի հետ զրույցում գյուղացիները տեղեկացրին, որ ունեն խմելու և ոռոգման ջրի խնդիր, անբարեկարգ են գյուղի, այդ թվում՝ գյուղի Սուրբ Մարիամ աստվածածին եկեղեցի տանող գլխավոր ճանապարհը: Մարդիկ դժգոհում են՝ չնայած խմելու ջրի աղբյուրն իրենց գյուղում է, սակայն շաբաթական մի քանի անգամ կամ լավագույն դեպքում 1 ժամ ջրամատակարարում են ստանում:
«Մեր ջրից օգտվում են մյուս գյուղերը, բայց մենք ջրին կարոտ ենք մնացել»,- նշեց գյուղացիներից մեկը:
ԲՀԿ թեկնածու Արմեն Մելքոնյանը «Առաջին լրատվական»-ի հետ զրույցում, նշեց, որ ընտրվելու դեպքում լուծելու է խմելու ջրի և ոռոգման խնդիրը, նաև գյուղում սգո և հանդիսությունների սրահ է կառուցելու, քանի որ գյուղացիները դրա կարիքը շատ ունեն:
«Պատկերացրեք՝ ձմռանը մեկը մահանում է մարդիկ ձյան մեջ են սեղաններ գցում»,- նշեց նա:
ԲՀԿ թեկնածուն նշեց նաև, որ ընտրությունների դեպքում գյուղի 40 ուսանողների համար կշահագործի անվճար բարեգործական ավտոբուս:
ԲՀԿ թեկնածուն նշեց, որ մարզպետի միջոցով մարդկանց վրա ճնշումներ են գործադրվել:
Գործող գյուղապետ Նորիկ Մովսիսյանը «Առաջին լրատվական»-ի հետ զրույցում նշեց, որ խմելու ջրի խնդիրը կապված է միայն ջրաչափերի տեղադրման աշխատանքների հետ: Նրա խոսքով՝ արդեն այս տարեվերջին հնարավոր է հարցին լուծում տրվի: Ինչ վերաբերում է եկեղեցի տանող անբարեկարգ ճանապարհին, գյուղապետը նշեց, որ այն չի ասֆալտապատում ֆինանսական միջոցների բացակայության պատճառով: «Հենց փող եղավ, էտ հարցերը կլուծենք: Մեր գյուղում հանգստացողները շատ են, և այս բոլոր հարցերին պետք է կամաց կամաց լուծում տանք»,- նշեց գյուղապետը:
Նշենք, որ Արզական գյուղն ունի 2300 բնակիչ, որոնցից ընտրություններին մասնակցում են սովորաբար 1500-ը:
14-00-ի դրությամբ արդեն 800 մարդ մասնակցել է ընտրություններին:
