Հնդկաստանի Հանրապետության Ազգային անվտանգության խորհրդի քարտուղար, վարչապետի ազգային անվտանգության գծով խորհրդական Շիվ Շանկար Մենոնի և Արաբական Միացյալ Էմիրությունների Ազգային անվտանգության բարձրագույն խորհրդի գլխավոր քարտուղար Սաիֆ Սուլթան Ալ Սարիանիի հրավերով, մարտի 1-8-ը աշխատանքային այցով Հնդկաստան, ապա` Արաբական Միացյալ Էմիրություններ կմեկնի Ազգային անվտանգության խորհրդի քարտուղար Արթուր Բաղդասարյանի գլխավորած պատվիրակությունը: Այս մասին հայտնում են ԱԽ քարտուղարի մամուլի գրասենյակից։
Պատվիրակությունը կհանդիպի Հնդկաստանի փոխնախագահ, Ազգային անվտանգության խորհրդի քարտուղար Շիվ Շանկար Մենոնի, արտաքին գործերի, պաշտպանության, ներքին գործերի պետական նախարարների, Հնդկաստանի պաշտպանական հետազոտությունների և վերլուծությունների ինստիտուտի ղեկավարության և այլ պաշտոնյաների հետ:
Արաբական Միացյալ Էմիրություններում պատվիրակությունը կհանդիպի Աբու Դաբիի գործադիր խորհրդի ղեկավար, թագաժառանգ Մուհամմադ բեն Զաիդ Ալ Նահայանի, Արաբական Միացյալ Էմիրությունների Ազգային անվտանգության բարձրագույն խորհրդի գլխավոր քարտուղար Սաիֆ Սուլթան Ալ Սարիանիի, արտաքին առևտրի նախարար Շեյխա Լուբնա Ալ Կասիմի և բարձրաստիճան այլ պաշտոնյաների հետ:
