Հույն երգիչ Դեմիս Ռուսոսն իր գործունեության 45-ամյակի առթիվ Մոսկվայում հանդես է եկել համերգով: Մեր ժամանակների ամենառոմանտիկ երգիչներից մեկի տոնական երեկոն անցել է Մոսկվայի Երաժշտության տանը: Այս մասին հաղորդում է ИТАР-ТАСС-ը:
66-ամյա արվեստագետը չորսուկես տասնամյակում հասել է համաշխարհային շռնդալից հաջողության, և դա, նրա խոսքով, իրեն թույլ է տալիս երգել այն երաժշտությունը, որն իրեն դուր է գալիս:
Երգիչը մոսկովյան համերգում ներառել էր ջազ, ֆրանսիական շանսոնիե, դասական օպերա, էթնո և ռոք: «Իմ նոր հնչողությունը նշանակում է վերադարձ արմատներիս, իսկ ես հույն եմ և շատ եմ սիրում իմ երկիրը»,- ասել է Ռուսոսը:
Սակայն չնայած փորձարկումների սիրահար լինելուն` Ռուսոսը կատարել է իր բոլոր հիթերը: Երգիչը հանդիսատեսին կոչ է արել պարել ու երգել իր հետ: Բոլորը միացել են իրեն: Նա նաև շփվել է հանդիսատեսի հետ մերթ անգլերեն, մերթ ռուսերեն:
66-ամյա երգիչը, ով ծնվել է Եգիպտոսում և ներկայումս ապրում է Փարիզում, իր մեջ միավորել է տարբեր երկրների և ժողովուրդների մշակույթն ու երաժշտությունը, և իր յուրահատուկ ձայնի շնորհիվ նա վայելել է ամբողջ աշխարհի ունկնդիրների սերը:
«Ինձ համար ամենակարևորը երաժշտությունն է, ուտելիքն ու կանայք, ընդ որում` հենց այս հերթականությամբ»,- իր մասին ասել է երգիչը:
