Արևմուտքի երկու խոշորագույն կենտրոնական բանկեր՝ ԱՄՆ-ի Դաշնային պահուստային համակարգը (ԴՊՀ) և Եվրոպայի կենտրոնական բանկը (ԵԿԲ) անցել են իրենց տրամադրության տակ եղած վերջին և ամենաուժեղ միջոցներին՝ անսահմանափակ դոլար և եվրո տպելուն:
Մի քանի օր առաջ Դաշնային պահուստային համակարգը հայտարարել է, որ անցնում է քանակական մեղմացման թվով երրորդ ծրագրին կամ QE3-ին: Այն արդեն ստացել է QE-անվերջություն ոչ պաշտոնական անվանումը:
Առաջինն այդ ճանապարհով գնացել են ԱՄՆ-ի Դաշնային պահուստային համակարգը և Եվրոպական կենտրոնական բանկը: ԴՊՀ-ն ամսական կծախսի 40 մլրդ դոլար հիփոթեկային արժեթղթեր գնելու վրա, մինչև որ երկրում վերականգնվի կայուն տնտեսական աճը: Մեկ ամսում ԴՊՀ-ն շուկաներ կուղարկի 85 մլրդ դոլարի չափով ակտիվներով չապահովված գումար: Բացի այդ, ԴՊՀ-ն երկարացրել է նվազագույն տոկոսային գործակիցները պահելու ժամկետը մինչև 2015թ. վերջը:
Ամսական ԱՄՆ-ում կտպվի 40 մլրդ դոլար, դա կարճաժամկետ ընթացքում բացասաբար կանդրադառնա արտարժույթի փոխարժեքի վրա: Առանցքային հարցն այն է, թե ինչպես այդ ծրագրին կարձագանքեն այլ կենտրոնական բանկեր: Այս մասին Bloomberg TV-ի ուղիղ եթերում հայտարարել է Standard Chartered-ի արժույթի հարցերով վերլուծաբան Քալում Հենդերսոնը:
Ճապոնիայի բանկը սեպտեմբերի 19-ին նույնպես որոշում է կայացրել ավելացնել արժեթղթերի գնման ծավալները մինչև 1 տրլն դոլար՝ տնտեսական աճը խթանելու համար:
ԵԿԲ-ն իր հերթին խոստացել է գնել եվրոգոտու խնդրահարույց երկրների պետական պարտատոմսերը՝ դրանց եկամտաբերության աճը կանգնեցնելու համար: Որոշ վերլուծաբաններ պնդում են, որ Անգլիայի բանկը նույնպես կմասնակցի տնտեսության խթանմանը:
ԵԿԲ ղեկավար Մարիո Դրագին հայտարարել է, որ եվրոյին մահացու վտանգ է սպասվում և առանց տվյալ միջոցառումների՝ եվրոգոտու ապագան հարցականի տակ կդրվի:
Արդյունքում գործարար աշխարհում պատրաստվում են, որ ֆինանսական շուկաներ կուղղվի եվրոյի և դոլարի անվերջանալի հոսք, երբ ԴՊՀ-ն և ԵԿԲ-ն կորդեգրեն իրենց ազգային պարտատոմսերի շուկայի առանցքային սեկտորների մոնետարիզացման կուրս:
Զարգացող երկրները մտավախություն ունեն, որ դա կարող է հանգեցնել ամերիկյան դոլարի հետագա դևալվացիային և հարված կհասցնի զարգացող երկրների տնտեսական մրցունակությանը:
