Հայաստանի անկախության 21-րդ տարեդարձը քաղաքում կնշվի տոնական միջոցառմամբ: Այս մասին «Առաջին լրատվական»-ի հետ զրույցում տեղեկացրին ՀՀ մշակույթի նախարարության հասարակայնության հետ կապի և լրատվության բաժնից: Երեկոյան ժամը 21.00-ին Երևանի Հանրապետության հրապարակում կմեկնարկի Forbidden Saints աշխարհահռչակ համույթի և հայ աստղերի մասնակցությամբ համերգը:
Երեկոյին իրենց կատարումներով առավել տոնական շունչ կհաղորդեն երգիչ-երգչուհիներ` Ռազմիկ Ամյանը, Ալլա Լևոնյանը, Արսեն Գրիգորյանը և այլք:
Ըստ մշակույթի նախարարության աշխատակցուհու՝ այս տարի միջոցառումը խորհրդանշական է, քանի որ տոնվում է անկախության 21-ամյակը, համերգը մեկնարկելու է ժամը 21-ին և տեղի է ունենալու այսօր՝ սեպտեմբերի 21-ին: Համերգը կտևի մոտավորապես մեկուկես ժամ:
Հիշեցնենք, որ նախորդ տարի Հանրապետության հրապարակում ևս տեղի ունեցավ Անկախության տոնին նվիրված միջոցառում՝ «Հերոսական բալլադ» 1 ժամ 20 րոպե տևողությամբ համերգ-ներկայացումը, որի ընթացքում հայ կոմպոզիտորների մեծարժեք դասական ստեղծագործություններից ընտրված հատվածների ուղեկցությամբ հանդիսատեսին ներկայացվեցին հայոց պատմության առանցքային դրվագները:
