Facebook սոցիալական ցանցում «Վարդան Այվազյանը պատասխան պետք է տա» վերտառության ներքո մեկնարկած ստորագրահավաքի գլխավոր պահանջն է, որպեսզի հետաքննվեն Վարդան Այվազյանի օրոք կնքված բոլոր պայմանագրերը այն պարզ տրամաբանությամբ, որ դրանցից շատերում կարող են լինել այնպիսի կոռուպցիոն գործարքներ, որոնցից մեկն արդեն բացահայտվել է:
«Առաջին լրատվական»-ի հետ զրույցում այս մասին ասաց «Բանակն իրականում» քաղաքացիական նախաձեռնության գործիչ, Վարդան Այվազյանի գործունեության վերաբերյալ հրապարակված պահանջագրի համահեղինակ Ծովինար Նազարյանը:
Նա հստակեցրեց, որ Facebook սոցիալական ցանցում բացված խմբին անդամագրվելը հավասարազոր է խմբում տեղադրված պահանջագրի ներքո ստորագրելուն, որի պահանջն է, որ Վարդան Այվազյանը պետք է հաշվետու լինի օրենքի և արդարադատության առջև:
«Բազմաթիվ ահազանգեր են եղել Վարդան Այվազյանի կոռումպացվածության, երկրին վնաս հասցնելու մասին, սակայն, ինչպես միշտ, անտեսվել են: Իսկ մենք հիմք ենք ընդունում Նյու Յորքի դատարանի որոշումը, որ կոռուպցիայի այն մեղադրանքները, որոնք Վարդան Այվազյանին առաջադրվել են պարբերաբար, հիմնավոր են:
Անկախ նրանից, թե քանի միլիոն գումար է պահանջվում Վարդան Այվազյանից, այդ վճռի մեջ իմ համար ամենակարևորն այն է, որ ապացուցված է համարվում, որ Վարդան Այվազյանն անպատշաճ առաջարկություններ է արել և կոռուպցիայի մեջ է փորձել ներգրավել ամերիկյան կազմակերպությանը:
Մեր նամակը պահանջում է, որպեսզի հետաքննվեն Վարդան Այվազյանի օրոք կնքված բոլոր պայմանագրերը այն պարզ տրամաբանությամբ, որ դրանցից շատերում կարող են լինել նման կոռուպցիոն գործարքներ»,- մեկնաբանեց Ծովինար Նազարյանը՝ շարունակելով, որ սրանից պետք է հետևություններ անել և վերականգնել պետությանը և տնտեսվարողներին հասցված վնասը:
Նկատենք, որ արդեն մի քանի օր մեկնարկած ստորագրահավաքին միացել է Facebook-ի շուրջ 300 օգտատեր:
Հիշեցնենք, որ սեպտեմբերի 6-ին Միացյալ Նահանգների Նյու Յորքի հարավային շրջանի Դատական ակտերի կատարման ծառայությունը կատարման էր տրամադրել Կատարողական թերթ՝ Վարդան Այվազյանի հանդեպ կատարման համար հոգուտ «Գլոբալ Գոլդ Մայնինգ» ՍՊԸ-ի (ԳԳՄ)։ ԳԳՄ-ի օգտին կայացրած որոշմամբ պետք է գանձվի երեսունյոթ միլիոն հինգ հարյուր երեսունյոթ հազար ինը հարյուր յոթանասունութ ԱՄՆ դոլար և երկու ցենտ, սակայն այս գումարը հնարավոր չէ գանձել, եթե չլինի տրիբունալ դատարանի որոշումը:
2006 թ. «Գլոբալ Գոլդ Մայնինգ» ընկերության դուստր ընկերություններից մեկը ենթարկվել էր կոռումպացիոն դրսևորումների Հայաստանի բնապահպանության նախկին նախարար Վարդան Այվազյանի կողմից։
