Հոկտեմբերի 28-ին ԱՄՆ եւ մի շարք այլ երկրների հատուկ ծառայությունները կանխել են խոշոր ահաբեկչություններ: Լոնդոնի եւ Դուբայի օդանավակայանում գտնվել է երկու ծանրոց, որոնց մեջ տեղադրված տպիչներում հատուկ սարքեր են ամրացվել` ԱՄՆ տարածքում կամ օդանավերում պայթյուն իրականացնելու համար: Նախնական տվյալներով, պայթուցիկ սարքերը եղել են քարթրիջների մեջ: Իսկ փոխադրման համար ահաբեկիչներն օգտվել են ավիափոխադրողներ UPS-ի եւ FedEx-ի ծառայություններից` նրանց միջոցով տեղափոխելով այդ ծանրոցները: Այս պահին բեռների բոլոր փոխադրումները Եմենից դադարեցված են:
Նաեւ պարզվել է, որ ահաբեկչության կազմակերպման մեջ մեղադրվում է Եմենի Ալ-Ղաիդայի մասնաճյուղը: Այս խումբը համարվում է Ալ-Ղաիդայի ամենաակտիվ մասնաճյուղը եւ կրում է «Ալ-Ղաիդան Արաբական թերակղզում» անվանումը:
Ամերիկյան որոշ աղբյուրներ տեղեկացնում են նաեւ, որ սրանք միակ փորձերը չեն, եւ հնարավոր է, որ նմանատիպ ծանրոցներ կրկին հայտնաբերվեն:
