Չինաստանի վարչապետ Վեն Ցզյաբաոն կոչ է արել Եվրամիությանը հանել Պեկինին զենք մատակարարելու էմբարգոն,- հաղորդում է Al-Jazeera-ն:
«Ես բաց կխոսեմ: Մենք ավելի քան 10 տարի ծանր աշխատանք ենք տարել, որպեսզի ԵՄ-ը ճանաչի Չինաստանի տնտեսության շուկայական բնույթը և հանի զենքի մատակարարման էմբարգոն: Սակայն կոնկրետ գործողություններ առայժմ չկան: Եվ ես խորապես ցավում եմ դրա համար»,- ասել է Վեն Ցզյաբաոն սեպտեմբերի 20-ին Եվրամիության խորհրդի նախագահ Հերման վան Ռոմպեյի, Եվրահանձնաժողովի ղեկավար Ժոզե Մանուել Բառոզուի և ԵՄ արտաքին քաղաքականության և անվտանգության հարցերով գերագույն հանձնակատար Քեթրին Էշթոնի հետ հանդիպմանը:
Հիշեցնենք. ԵՄ-ը Չինաստանին սպառազինություն մատակարարելու վրա էմբարգո է դրել 1989 թ. Տյանանմեն հրապրակում ցույցը ճնշելուց հետո: Ֆրանսիան և Իտալիան կոչ են անում վերանայել այդ որոշումը, սակայն Մեծ Բրիտանիան դեմ է դրան:
Ավելի վաղ Չինաստանը խոստանում էր ԵՄ-ին ֆինանսական օգնություն տրամադրել, եթե իրեն զիջումներ արվեն սպառազիության առևտրի ոլորտում և ճանաչվի Չինաստանի տնտեսությունը Համաշխարհային առևտրական կազմակերպության շրջանակներում:
Փորձագետները նշում են, որ Չինաստանի վարչապետի բանակցությունները ԵՄ-ի իշխանությունների հետ կարևոր են երկու կողմերի համար էլ: Եվրամիությանն անհրաժեշտ է ֆորմալ աջակցություն ստանալ Չինաստանի կողմից, որի ոսկու պաշարները գերազանցում են 3 տրլ դոլարը: Իսկ Չինաստանին անհրաժեշտ է զարգացնել հարաբերությունները ԵՄ-ի հետ տարվա վերջին էլիտայի փոփոխությունից առաջ: ԵՄ-ը Չինաստանի խոշորագույն առևտրական գործընկերն է:
