«Ուսուցչի օրվա» նախաշեմին ՀՀ կրթության և գիտության նախարարությունում այսօր տեղի է ունեցել «Տարվա լավագույն ուսուցիչ», «Տարվա լավագույն տնօրեն» և «Տարվա լավագույն դաստիարակ» մրցույթների հանրապետական փուլը, որն անցկացրել են ՀՀ կրթության և գիտության նախարարի հրամանով ստեղծված հանձնաժողովները: Այս տարի մրցույթներին մասնակցում էր 34 մանկավարժ` ՀՀ բոլոր մարզերից և Երևանից:
ՀՀ ԿԳՆ լրատվական ծառայությունից «Առաջին լրատվական»-ին հայտնում են, որ մրցույթի ամփոփումից հետո կպարզվեն «Տարվա լավագույն ուսուցիչը», «Տարվա լավագույն տնօրենը» և «Տարվա լավագույն դաստիարակը»: Ըստ ավանդույթի` հաղթողների անունները կհրապարակվեն «Ուսուցչի օրը»` հոկտեմբերի 5-ին նախատեսվող տոնական միջոցառման ընթացքում: «Տարվա լավագույն ուսուցչին» և «Տարվա լավագույն դաստիարակին» ՀՀ վարչապետի կողմից կտրվեն ավտոմեքենաներ, իսկ վաստակաշատ մանկավարժներին` պետական պարգևներ, ՀՀ վարչապետի «Հուշամեդալ» և շնորհակալագրեր:
«Տարվա լավագույն ուսուցիչ» մրցույթում այս տարի սահմանվել են հետևյալ անվանակարգերը`
«Նվիրում երեխաներին»,
«Ավանդույթները և նորարարությունը մանկավարժության մեջ»,
«Ազգային ավանդույթները պահպանելու և փոխանցելու համար»:
«Տարվա լավագույն տնօրեն» մրցույթում սահմանվել են հետևյալ անվանակարգերը`
«Ուսումնադաստիարակչական աշխատանքները լավագույնս կազմակերպելու համար»,
«Հայրենասիրական և գեղագիտական դաստիարակության լավագույն փորձի համար»,
«Ուսուցման նորագույն մեթոդների ներդրման լավագույն փորձի համար»,
«Տարվա լավագույն դաստիարակ» մրցույթում սահմանվել են հետևյալ անվանակարգեր`
«Սիրտս նվիրում եմ երեխաներին»,
«Երեխաների կյանքը հետաքրքիր անակնկալներով հարստացնելու համար»,
«Բնության կրտսեր բարեկամ դաստիարակելու համար»:
