Լրագրողների հետայսօրվա հանդիպման ժամանակ ՀՀ ֆինանսների նախարար Վաչե Գաբրիելյանը ամեն կերպ խուսափում էր այն հարցից, թե արդյոք նորմալ է այն, որ ՀՀ-ում մեքենան մաքսազերծելու համար մի քանի տասնյակ անգամ ավելի շատ գումար է պահանջվում, քան Վրաստանում: Նա ասուլիս էր հրավիրել` վրացական համարներով մեքենաներին պետական վարկ տրամադրելու հարցի մասին խոսելու համար և չէր ուզում խոսել վերընշված հարցից, որն էլ, ըստ էության, առաջացրել է վրացական համարներով մեքենաների հետ կապված խնդիրը:
«Եթե այդ տրամաբանությամբ գնանք, ապա ՀՀ-ում որևէ բան չի կարող ավելի թանկ լինել, քան Վրաստանում, սակայն մենք միասնական երկիր չենք և այդ տեսակետից ունենք տարբերություններ, սակայն այդ հարցը այստեղ տեղին չէ: Մենք չենք քննարկում մաքսային քաղաքականության արդյունավետության, արդարացիության խնդիրը»,- ասաց Վ. Գաբրիելյանը:
Նրա խոսքով մաքսային օրենսգիրքը վերանայելու ընթացակարգեր կան: «Ես չեմ բացառում, որ մեզ մոտ մաքսային ընթացակարգերը կարող են լավագույնը չլինել, չեմ բացառում նաև, որ դրանք քննարկման ենթական են: Սակայն խոսքը այստեղ չի վերաբերում մաքսային օրենսգրքի լավ կամ վատ լինելուն: Խոսքը վերաբերում է բոլորի համար օրենքի հավասար լինելուն»,- ասաց Վ. Գաբրիելյանը:
Մեր բոլոր տեսանյութերը կարող եք դիտել «ՏԵսանյութ» բաժնում` http://1in.am/arm/more_mvideo.html
