Թուրքական Milliyet թերթի փոխանցմամբ՝ Թուրքիայի վարչապետ Ռեջեփ Էրդողանը երեկ երեկոյան անակնկալ հանդիպում է ունեցել Թուրքիայի զինված ուժերի գլխավոր շտաբի պետ, բանակի գեներալ Նեջդեթ Օզելի հետ: Թեպետ նախապես այդ հանդիպումն ընդգրկված չի եղել Էրդողանի պաշտոնական հանդիպումների ծրագրում, այնուամենայնիվ այն տևել է մոտ 2.5 ժամ:
Այդ հանդիպման պատճառ է հանդիսացել այն, որ Քրդստանի աշխատավորական կուսակցության (PKK) զինյալները երեկ Բինգյոլի (Բյուրակն) շրջանում հարձակում են գործել մոտ 200 զինծառայողի վրա՝ սպանելով նրանցից 10-ին և վիրավորելով 60-ին: Էրդողանն Օզելի հետ քննարկել է այս և PKK-ի նմանօրինակ այլ հարձակումների հարցը: Օզելն այդ հարձակման հետ կապված տեղեկություններ է հաղորդել Էրդողանին:
Կողմերը քննարկել են նաև անդրսահմանային օդային օպերացիաներ իրականացնելու հարցը, ինչպես նաև Օզելն Էրդողանին իրազեկել է ԱՄՆ զինված ուժերի միացյալ շտաբների ղեկավար Մարտին Դեմփսիի հետ իր հանդիպման և մասնավորապես ամերիկյան հետախուզական օգնության մասին:
Բինգյոլի հարձակման հետ կապված՝ Էրդողանը երեկ հանդիպել է նաև փոխվարչապետ Բեշիր Աթալայի, գլխավոր խորհրդական Յալչըն Աքդողանի, իշխող «Արդարություն և զարգացում» կուսակցության (ԱԶԿ) փոխնախագահ Օմեր Չելիքի և Ազգային հետախուզական կազմակերպության (MIT) ղեկավար Հաքան Ֆիդանի հետ։
