Սիրիայում Թեհրանի աջակցությունը Բաշար Ասադի վարչակարգին սպառնալիք է երկրների միջև ցանկացած տիպի հարաբերություններին: Այս մասին Եգիպտոսի նախագահ Մուհամմեդ Մուրսին հայտարարել է երեքշաբթի Կահիրեում Իրանի արտգործնախարար Ալի Աքբար Սալեհիի հետ հանդիպման ժամանակ:
Մուրսին նշել է, որ Եգիպտոսը չի կարող աչք փակել Սիրիայում տեղի ունեցող արյունալի իրադարձությունների վրա:
«Բաշար Ասադի իշխանությունն իր քաղաքացիների նկատմամբ կոշտ և դաժան ուժ է գործադրում, ինչի հետ համակերպվել հնարավոր չէ»,- Եգտիպտոսի նախագահի խոսքն է մեջբերում ZMAN.com-ը:
Հիշեցնենք, որ ավելի վաղ Մուրսին հայտարարել է, որ Սիրիայի ժողովրդի` ազատության և արդարության համար պայքարում համերաշխությունը միաջազգային հանրության «բարոյական պարտքն է»: Այս խոսքերից հետո Սիրիայի պատվիրակությունը լքեց նիստերի դահլիճը:
Նշենք, որ այսօր Կահիրեում ավարտվել է Սիրիայի խնդրի կարգավորմամբ մտահոգ «Կոնտակտային խմբի» հանդիպումը: Այդ խմբում ընդգրկված են Թուրքիան, Սաուդյան Արաբիան և Եգիպտոսը, որոնք հանդես են գալիս հօգուտ նախագահ Ասադի պաշտոնաթողության, ինչպես նաև Իրանը, որը սատարում է երկրի ներկայիս իշխանությանը:
Իրանի ԱԳՆ ղեկավար Ալի Աքբարը դեմ է հանդես եկել հանդիպման մասնակից երկրների` Ասադի պաշտոնաթողության կոչին: Սալեհին հայտարարել է, որ նախապայմանների առաջքաշումը կբարդացնի Սիրիայում ճգնաժամի հաղթահարումը:
