«Մեր քաղաքը» քաղաքացիական նախաձեռնությունը երեքշաբթի օրը՝ սեպտեմբերի 18-ին, անցկացրեց ակցիա՝ Փակ շուկայից մինչև Աֆրիկյանների տուն: Ակցիան կրում էր «Քանդելն արգելվում է հասարակության կողմից» խորագիրը:
Ակցիայի մասնակիցների խոսքերով՝ իրենց հիմնական նպատակն է Աֆրիկյանների շենքի պահպանությունը. «Այս ակցիայի միջոցով ցանկանում ենք պայքարել, որպեսզի չքանդեն Աֆրիկյանների տունը: Փակ շուկան արդեն լրիվ քանդվել է, պետք է փորձենք գոնե սա պահպանել: Չեմ կարող ասել, թե ինչ արդյունքի կհասնենք, բայց ամեն դեպքում հասարակության լայն զանգվածներին փորձում ենք տեղյակ պահել, որ կա նման խնդիր, որի համար պետք է պայքարել»,- ասաց ակցիայի մասնակից ակտիվիստներից Արուսը:
Ակցիայի մեկ այլ մասնակից նշեց, որ կորցնելով նման շենքը՝ կկորցնենք նաև պատմության մեծ էջ. «Ցավով եմ նշում, որ հանրապետական նշանակություն ունեցող նման հուշարձանը մենք շուտով կկորցնենք: Ես նույնիսկ բառեր չեմ գտնում ասելու, թե հանրապետական նշանակություն ունեցող այս յուրօրինակ շենքը ինչպես կարելի էր քանդել՝ Տերյան փողոցը լայնացնելու համար: Եթե ցանկանում են փողոցը լայնացնել, թող դիմացի էլիտար շենքերը քանդեն»:
Մասնակիցները երթով շարժվեցին մինչև Աֆրիկյանների շենք, որտեղ էլ շարունակվեց բողոքի ակցիան:
