Irish Daily Star թերթի խմբագիրՄայքլ Օ`Քեյնին հեռացրել են աշխատանքից բրիտանացի արքայազն Ուիլյամի կնոջ` Քեյթ Միդլթոնի մասամբ մերկ լուսանկարների հրապարակման պատճառով: Ինչպես տեղեկացնում է Agence France-Presse-ը, հրատարակության սեփականատերերը` Northern and Shell բրիտանական խումբն ու իռլանդական Independent News and Media-ն, նման որոշում են կայացրել սեպտեմբերի 17-ին:
Խմբագրությունում ներքին հետաքննություն է անցկացվում` պարզելու լուսանկարների հրապարակման հանգամանքները: Northern and Shell-ի տնօրենների խորհրդի ղեկավար Ռիչարդ Դեսմոնդը սպառնացել է լիովին փակել Irish Daily Star-ը:
Հիշեցնենք, որ բրիտանացի թագավորական զույգի սկանդալային լուսանկարներն առաջինը հրապարակել էր ֆրանսիական Closer փայլերես հրատարակությունը:
Irish Daily Star-ի խմբագիր Մայքլ Օ’Քեյնը պնդում է, որ թերթն իրավունք ունի հրապարակելու դքսուհու նկարներն այնպես, ինչպես ցանկացած հանրահայտ անձի:
Նշենք, որ Քեյթն ու Ուիլյամը դատական հայց են ներկայացրել Ֆրանսիայում` փորձելով հասնել լուսանկարների հետագա հրապարակման դատական արգելքին:
