Վայքի նորանշանակ մարզպետ, ՀՀԿ-ական Էդգար Ղազարյանը նախընտրական քարոզարշավի շրջանակներում ուղեկցում է Եղեգնաձորի քաղաքապետի թեկնածու առաջադրված, գործող քաղաքապետ, ՀՀԿ-ական Սիրեկան Բաբայանին: «Առավոտ»-ի տեղեկություններով` մարզպետն իր ելույթներում խիստ քննադատության է ենթարկում իր նախորդին` Սերգեյ Բագրատյանին, ով ԲՀԿ-ն էր ներկայացնում:
«Եթե ձայն տաք ԲՀԿ-ին, Ձեզ մի հատ զիբիլի ավտո է տալու: Ընտրություններից երկու օր առաջ փուչիկներ կկապեն վրան, իրենք` էլ մի 30 «ջիպ»-երով կընկնեն ետևից կգան, դեմը կկանգնեն` կերգեն, կպարեն, զիբիլի ավտոն կտան ու կգնան»,- հանդիպումներից մեկի ժամանակ ասել է Էդգար Ղազարյանը:
«Առավոտի» հետ զրույցում մարզպետը հաստատեց, որ ոչ աշխատանքային ժամերին ինքն իսկապես ուղեկցում է Սիրեկան Բաբայանին: Հաստատեց նաև, որ քննադատական խոսքեր հնչեցրել է նախկին մարզպետի ե ԲՀԿ-ի հասցեին. «Քննադատությունս էլ ոչ թե վերաբերում է անձնապես նախկին մարզպետին, այլ, ես այսպես եմ հիշում իմ ելույթներում, որ կոալիցիոն համաձայնագրով մեր մարզը ղեկավարելու իրավասությունը վերապահվել է ԲՀԿ-ին` շուրջ հինգ տարի: Այդ ընթացքում երկու տարբեր մարդիկ են եղել մարզպետներ: Ես համեմատության մեջ եմ դնում ԲՀԿ-ի կարգախոսը` «Միասին կառուցենք բարգավաճ երկիրը», իրականության հետ»:
