Իրանական IRNA լրատվական գործակալության փոխանցմամբ՝ Իրանի փոխնախագահ Սեյեդ Մոհամեդ Ռեզա Միրտաջեդդինը հայտարարել է, թե իրենք տեղեկատվություն են ստացել, որ իրենց թշնամիները մտադիր են խոչընդոտել Իրանի նախագահ Մահմուդ Ահմադինեժադի նյույորքյան այցի լուսաբանումը.
«Իրանի նախագահը սեպտեմբերի 21-ին Նյու Յորքում կմասնակցի ՄԱԿ ԳԱ-ի տարեկան նստաշրջանին: Մահմուդ Ահմադինեժադն Իրանի միակ նախագահն է, որը մասնակցել է ՄԱԿ ԳԱ-ի բոլոր նստաշրջաններին: Տվյալ փաստը վկայում է գլոբալ ղեկավարման մեջ Իրանի ակտիվ ու ազդեցիկ դերի մասին:
Իրանի նախագահը ելույթ կունենա ՄԱԿ ԳԱ-ի նստաշրջանում: Այցի շրջանակներում նա մի շարք բանակցություններ կվարի առաջատար քաղաքական և հասարակական գործիչների հետ, ինչպես նաև կայցելի ամերիկյան համալսարաններ: Նախկին այցերի ընթացքում մեր չարակամները փորձել են չեղյալ հայտարարել ԱՄՆ բարձրագույն ուսումնական հաստատություններում մեր նախագահի հանդիպումները: Նրանք մտադիր են նույնն անել նաև այս անգամ»:
