«Ձախ ճակատի» առաջնորդ Սերգեյ Ուդալցովը ազատ է արձակվել Տվերի շրջանի ներքին գործերի նախարարության բաժանմունքից: Այս մասին հաղորդում է Rosbalt-ը:
«Ինձ ազատ են արձակել ոստիկանությունից, արձանագրությունում նշված է ձերբակալման սխալ ժամ` 22:01: Ցավում եմ, որ իշխանությունը փչացրեց խաղաղ ցույցը»,- Twitter-ի իր միկրոբլոգում գրել է Սերգեյ Ուդալցովը:
Նրա փաստաբան Վիոլետա Վոլկովայի խոսքով` Մոսկվայի Սախարովի պողոտայում միջոցառման ավարտից 5 րոպե առաջ «Ձախ ճակատի» առաջնորդ Սերգեյ Ուդալցովի ձերբակալությունը անօրինական է:
«Ձերբակալությունը իրականացվել է նախազգուշական նկատառումներով` հենց այնպես: Հավանաբար, նրանք ժամերը չէին համապատասխանեցրել: Երևի Ուդալցովին, որպես երեխա, չի թույլատրվում փողոց դուրս գալ ժամը 22-ից հետո»,- նշել է փաստաբանը:
Ոստիկանությունը այլ վարկած ունի: Նշվում է, որ ժամը 22-ին` կապված միջոցառման պաշտոնական ավարտի հետ, ոստիկանությունը մասնակիցներին խնդրել է ազատել պողոտայի մի հատվածը` երթևեկության վերականգնման համար: Սակայն Ուդալցովը չի ենթարկվել ոստիկանների օրինական պահանջներին, ակցիայի կազմակերպիչներին, հասարակության ներկայացուցիչների խնդրանքներին և փորձել է չարտոնված երթ կազմակերպել Չիստոպռուդնի բուլվարում:
