Սաուդյան Արաբիայում մի քանի հարյուր մտավորականներ` գիտության և մշակույթի գործիչներ, հասարակական կազմակերպությունների ներկայացուցիչներ, դիմել են երկրի թագավորին` կոչ անելով սկսել բարեփոխումներ և փոխել պետական կարգը` Սաուդյան Արաբիան դարձնելով սահմանադրական միապետություն: Այս մասին գրում է RBC-ն:
Իրենց հայտարարության մեջ մտավորականները նշել են հովանավորչության, կաշառակերության և այդ ամենի դեմն առնելու անհրաժեշտության մասին:
Իրավիճակը Սաուդյան Արաբիայում համեմատաբար հանգիստ է: Սակայն թագավորական ընտանիքը հնարավոր հուզումները կանխարգելելու համար մի քանի օր առաջ որոշում է կայացրել ավելի քան 36 մլրդ դոլար ուղղել սոցիալական ծրագրերին` չքավոր և կարիքավոր ընտանիքների ծախսերը հոգալուն: Փետրվարի 27-ին էլ իշխանությունները որոշում են կայացրել մշտական աշխատանք ձևակերպել բոլոր պետական պաշտոնյաների համար, որոնք մինչ այդ աշխատում էին ժամանակավոր պայմանագրերով:
«Առաջին լրատվականը» նաև տեղեկացրել էր, որ ներկայիս թագավորի հորեղբորորդին՝ Թալան բեն Աբդ Ալ-Ազիզը, դիմել էր թագավորին անհապաղ բարեփոխումներ սկսելու կոչով, քանի դեռ փողոցային ցույցերը չեն ձեռք բերել նույն դրսևորումները, ինչ Թունիսում և Եգիպտոսում: Սաուդյան Արաբիայում տեղի մտավորականության մասնակցությամբ ստեղծվել էր նաև երկրի առաջին կուսակցությունը, ինչն աննախադեպ էր վահաբիստական այս պետության համար:
