Մադրիդի «Ռեալ»-ն այսօր՝ ՀՀ ժամանակով 00:00-ին կհյուրընկալվի «Սևիլիա»-ին: Քրիշտիանու Ռոնալդուն իր խնդրահարույց հայտարարությունից հետո առաջին անգամ է խաղադաշտ դուրս գալու Մադրիդի «Ռեալ»-ի կազմում: Այս ամենի ստվերում մի հարց է մնում. Ռոնալդուն գոլի հեղինակ դառնալու դեպքում կտոնի՞ այն, թե՞ ոչ: Մադրիդի «Սպիտակ տանը» համոզված են, որ կտոնի:
Ռոնալդուն չտոնեց «Գրանադա»-ի դեմ խաղում խփած գոլը, որը շատերի մոտ կասկած առաջացրեց, նույնիսկ Մոուրինյոյի: Խաղից հետո հանդիպելով Պերեսին՝ Ռոնալդուն հայտնել էր, որ ինքն իրեն լավ չի զգում «արքայական ակումբում»: Տարբեր լրատվամիջոցներ տարբեր մեկնաբանություններ տվեցին այս խնդրի վերաբերյալ. մերթ Ռոնալդուն աշխատավարձի բարձրացում էր ուզում, մերթ ավագի թևկապ, մերթ տխրության պատճառը համարվում էր Եվրոպայի լավագույն ֆուտբոլիստի տիտղոսը չստանալը: Սակայն այն, որ Ռոնալդուն տխուր էր, կասկած չի հարուցում:
Ֆուտբոլիստը նշեց հաջողությունը Պորտուգալիայի ազգային հավաքականի կազմում: Իսկ ինչ կարելի է սրանից ենթադրել. կարելի՞ է արդյոք եզրակացնել, որ Ռոնալդուի տխրության պատճառը սերտ առնչություն ունի «Ռեալ»-ի հետ, քանի որ, եթե կապ չունենար, նա գոլը չէր տոնի նաև Պորտուգալիայի հավաքականի կազմում:
Մադրիդի 7 համարը միշտ առանձնահատուկ է եղել, հաշտվողական տրամադրությամբ: Հավաքականից վերադառնալուց հետո թիմակիցները հավատում են, որ ֆուտբոլիստի «ուժեղ փոթորիկն» արդեն անցյալում է, սակայն քչերը գիտեն, թե Ռոնալդուն գոլ խփելու դեպքում ինչպես կարձագանքի:
Մի բան, սակայն, պարզ է. Ռոնալդուի մեկնարկը «Պիչիչի»-ում (ամենաշատ գոլեր հեղինակած ֆուտբոլիստին տրվող մրցանակն է) այդքան էլ լավը չէ: Նա իր ակտիվում ունի 2 գնդակ, իսկ Մեսսին արդեն չորսն է հեղինակել:
