«Թալիբան» շարժման ներկայացուցիչը BBC-ին հաստատել է, որ իրենք են կանգնած Աֆղանստանի «Քեմփ Բաստիոն» բազայի վրա հարձակման ետևում, որտեղ այս պահին ծառայություն է անցնում Բրիտանիայի արքայազն Հարրին:
Բազան տեղակայված է Գիլմենդ մարզում: Նախնական տվյալներով՝ զինյալներին հաջողվել է ավերել բազան շրջապատող պատի մի մասը: Հարձակվողներն իրենց տրամադրության տակ ունեցել են ականանետներ և նռնականետներ: Արքայազն Հարրին հարձակման արդյունքում չի տուժել:
Ըստ Քաբուլում BBC-ի թղթակցի՝ «Թալիբան»-ի ներկայացուցիչը հայտարարել է, որ հարձակումը եղել է վրեժ հակաիսլամական «Մուսուլմանների անմեղությունը» ֆիլմի համար: Նա նշել է, որ հարձակման թիրախը ամերիկացի և բրիտանացի զինվորներն են, և որ դրան մասնակցել է 10 զինյալ: Վերջինիս խոսքերով՝ թալիբների և օտարերկրյա զինծառայողների միջև մարտը դեռ շարունակվում է:
Հիշեցնենք. սեպտեմբերի 11-ին համացանցում «Մուսուլմանների անմեղությունը» հակաիսլամական ֆիլմի թրեյլերի հայտնվելուց հետո բողոքի ալիք բարձրացավ մուսուլմանական աշխարհում: Լիբիայում այն ավարտվեց այդ երկրում ԱՄՆ-ի դեսպանի սպանությամբ:
