Փետրվարի 27-ին իր հրաժարականի մասին հայտարարությամբ հանդես է եկել Ֆրանսիայի արտաքին գործերի նախարար Միշել Ալիո-Մարին: Այս մասին հաղորդում է France Presse գործակալությունը:
Բոլորն այս հրաժարականը կապում են Թունիսում դեպքերի հետ: Հուզումների և բողոքի ակցիաների սկզբնական փւլում Միշել Ալիո-Մարին հայտարարել է Բեն Ալիին ֆրանսիական վարչակազմի աջակցության մասին, ինչի համար ենթարկվել էր քննադատության: «Առաջին լրատվականը» նաև հաղորդել էր, որ մամուլում տեղեկություններ էին հայտնվել Բեն Ալիի և Ֆրանսիայի արտգործնախարարի ընտանիքների միջև կապի մասին, երբ պարզվել էր, որ Միշել Ալիո-Մարին իր ընտանիքով հանգստացել է Թունիսում` այդ երկրի նախագահի հաշվին:
Միշել Ալիո-Մարին հայտարարության մեջ նշել է, որ իր արարքներում ոչ մի հակաօրինական բան թույլ չի տվել, և քննադատել է իր դեմ արշավ սկսած հակառակորդներին: Նա ասել է, որ ինքը և իր ընտանիքը վերջին մի քանի շաբաթներին ենթարկվել են «հարձակումների», ինչը կարող էր ազդել երկրի վարկի վրա: Այդ իսկ պատճառով նա հրաժարականի դիմում է ներկայացրել:
Ավելի ուշ Սարոկզին հայտարարել է, որ այդ պաշտոնին նշանակում է պաշտպանության նախարարի պաշտոնը զբաղեցնող Ալեն Ժյուպեին, որը 90-ականներին եղել է նաև Ֆրանսիայի վարչապետ: