2012 թ. հունվար-օգոստոս ամիսներին միջազգային ուղևորահոսքերի բացասական մնացորդը (հանրապետությունից մեկնածների թվի գերազանցումը հանրապետություն ժամանածների թվին) նախորդ տարվա նույն ժամանակահատվածի համեմատ ավելացել է 15.5 հազարով կամ 20.7%-ով և կազմել -90.8 հազար մարդ:
Ընդ որում, Միգրացիայի պետական գործակալության հրապարակած տվյալների համաձայն՝ օգոստոսին միջազգային ուղևորահոսքերի բացասական մնացորդը կազմել է 7.0 հազար մարդ՝ նախորդ տարվա օգոստոսի 3.4 հազար դրական մնացորդի դիմաց:
2012 թ. հունվար-օգոստոս ամիսներին ուղևորահոսքերի ընդհանուր ծավալը, նախորդ տարվա նույն ժամանակահատվածի համեմատ, ավելացել է 287.7 հազար մարդով կամ 11.2%-ով և կազմել 2863.7 հազար մարդ: Օդային տրանսպորտով սահմանը հատած ուղևորների տեսակարար կշիռը ուղևորափոխադրումների ընդհանուր ծավալում կազմել է 41.8%:
Նշենք, որ օգոստոսին, դրականի փոխարեն, բացասական մնացորդի փաստը խիստ բացասական է, քանի որ այդ ամսին գոնե ՀՀ ժամանող զբոսաշրջիկների հաշվին պետք է դրական մնացորդ լիներ:
Սրա բացատրությունը մեկն է` արտագաղթի տեմպերն ահագնանում են:
