Apple-ի ամերիկացի աշխատակիցների համար այսօր հիշարժան օր է՝ iPhone 5-ի թողարկման օրը: Սակայն Չինաստանի Foxconn ընկերությունում, որտեղ հավաքվում է տարեկան 57 մլն iPhone, այնքան էլ շատ չեն ժպտացող դեմքերը: Այս մասին տեղեկացնում է Daily Mail-ի լրագրող Էդդի Ռենը:
Նորությունների Shanghai Evening Post գործակալությունը գործարան է ուղարկել անհայտ լրագրողի, որը 7 օր անցել է նախապատրաստական շրջան, ապա 3 օր աշխատել գործարանում: Այդ ամբողջ ընթացքում լրագրողն օրագիր է պահել, իսկ հետո micgadget.com կայքը այն թարգմանել է: Այս մասին հաղորդում է հրատարակությունը:
Հոդվածագիրը փոխանցում է իր չինացի գործընկերոջ խոսքերը. «Երբ ես մոտեցա Foxconn գործարանի մուտքին, ինձ մոտեցավ անվտանգության աշխատակիցը ու խնդրեց 100-200 յուան (15-28 դոլար)` սովորեցնելու համար արագ աշխատել, սակայն ես անտեսեցի նրան»:
Ինձ խնդրեցին լրացնել փաստաթղթի ձև, որը թեստավորում էր իմ հոգեկան ներկայիս վիճակը: Օրինակ՝ թեստն ուներ այսպիսի հարց. «Վերջերս ընկե՞լ եք արդյոք տրանսի մեջ»: Դրանից հետո լրագրողին ու մյուս աշխատակիցներին ավտոբուսով տարել են գործարան:
Այն, ինչ լրագրողը տեսել է գործարանին կից հանրակացարանում, նրան ցնցել է. «Դա սարսափելի էր: Հանրակացարանից աղբանոցի հոտ էր փչում: Երբ ես բացեցի իմ սենյակի պահարանը, դուրս վազեցին խավարասերները: Ես նկատեցի, որ հանրակացարանի բոլոր լուսամուտները փակ են»:
«Այն բանից հետո, երբ անցանք նախապատրաստական շրջան, մեզ տարան աշխատելու, թեև արդեն գիշեր էր: Մեզ թույլատրում էին հանգստանալ միայն ցերեկային ժամերին»,- Shanghai Evening Post-ի լրագրողի խոսքերը մեջբերում է Էդդի Ռենը:
«Նոր աշխատակիցը, ով իմ դիմաց էր նստած, կարճ ժամանակով պառկեց: Ղեկավարը դա նկատելով` նրան 10 րոպեով անկյուն կանգնեցրեց, ինչպես դպրոցական տարիներին»,- գրել է լրագրողը:
«Թեև ոչ մի երաշխիք չկա, որը հաստատի այս ռեպորտաժի իրական բնույթը, մեզ ամեն դեպքում թվում է, թե Apple-ի երկրպագուները պետք է գնահատեն այն ծանր աշխատանքը, որ նրանք կատարել են՝ նոր iPhone-ի թողարկումը նախանշված օրը հասցնելու համար»,- տեղեկացնում է micgadget.com կայքի խմբագիրը, ով իր կայքում հրատարակել էր այդ նյութը:
