«Ալ-Քաիդա» ահաբեկչական կազմակերպությունը համացանցում տեսանյութ է տեղադրել, որում ամերիկացի պատանդ Ուորեն Ուայնսթայնը օգնության խնդրանքով դիմում է Իսրայելի ղեկավարությանը, հաղորդում է ABC News-ը:
Տեսանյութում 71-ամյա Ուայնսթայնը ուղղակիորեն դիմում է Իսրայելի վարչապետ Բենիամին Նեթանյահուին. «Ցավոք, նախագահ Օբաման և ԱՄՆ կառավարությունը ցույց տվեցին, որ իրենք ինձ համար ժամանակ չունեն: Ուստի ես, որպես հրեա, դիմում եմ ձեզ՝ հրեական պետության ղեկավարին: Խնդրում եմ միջնորդել իմ գործում»:
Ուայնսթայնը, որը նախկինում աշխատել է ԱՄՆ կառավարությունում և Պակիստանի մասնավոր ընկերությունում, առևանգվել է Լահոր քաղաքում 2011թ.: Նրա դիմաց զինյալները պահանջում էին բանտերից ազատել իրենց համախոհներին և դադարեցնել օդից հարվածները: Սակայն ո՛չ Պակիստանը, ո՛չ ԱՄՆ-ը պաշտոնապես չարձագանքեցին այդ պահանջին, չնայած ահաբեկիչները սպառնում էին սպանել պատանդին, եթե իրենց պահանջները չկատարվեն:
Իսրայելի պաշտոնատար անձինք առայժմ չեն մեկնաբանել տեսանյութը:
