Հանրապետական կուսակցության պատգամավոր, Թալինի նախկին քաղաքապետ Մնացական Մնացականյանի կինը՝ Թամարա Գևորգյանը, օգոստոսի 2-ին հեռացվել էր Թալինի բժշկական կենտրոնի տնօրենի պաշտոնից՝ վատ աշխատանքի պատճառով: Սակայն արդեն երկրորդ ամիսն է` նա խոչընդոտներ է ստեղծում հիվանդանոցի բնականոն աշխատանքի համար:
Այս մասին «Առաջին լրատվական»-ին տեղեկացրեց Թալինի բժշկական կենտրոնի ներկայիս տնօրեն Արմեն Խաչատրյանը: Ըստ նրա՝ որոշ շատ կարևոր փաստաթղթեր գտնվում են Թամարա Գևորգյանի մոտ, որոնք նա չի հանձնում՝ դրանով իսկ խոչընդոտելով բժշկական կենտրոնի բնականոն աշխատանքին:
«Նրա մոտ կարևոր փաստաթղթեր են՝ հրամանագրքեր, պետռեգիստրի վկայական, հաստիքացուցակ, հարկային կոդ. այդ բոլոր փաստաթղթերն իր մոտ են, որոնք նա չի հանձնում»,- պարզաբանեց Արմեն Խաչատրյանը:
Վերջինս տեղեկացրեց, որ նախկին տնօրենին հորդորել են վերադարձնել փաստաթղթերը, սակայն նա հրաժարվում է: Հարցին` ինչպե՞ս է պատրաստվում լուծել առաջացած խնդիրը, բժշկական կենտրոնի ղեկավարն ասաց` խնդիրը կլուծի օրինական ճանապարհով` ինչպես օրենքն է պահանջում:
Հիշեցնենք, որ Թամարա Գևորգյանի պաշտոնանկությունից հետո սկսեցին խոսակցություններ շրջանառվել, թե պաշտոնանկությունը քաղաքական դրդապատճառներ ունի: Մասնավորապես՝ շրջանառվում էր տեսակետ, թե Թամարա Գևորգյանի պաշտոնանկության պատճառը նրա ամուսնու քաղաքական քայլերն են, այն, որ Մնացական Մնացականյանը դեմ գնալով Հանրապետականի որոշմանը` Թալինի քաղաքապետի ընտրություններում չէր սատարել ՀՀԿ պաշտոնական թեկնածու Սարգիս Արամյանին: Սակայն ավելի վաղ «Առաջին լրատվական»-ի հետ զրույցում Արագածոտնի մարզպետ Սարգիս Սահակյանը հերքել էր այդ տեղեկությունները:
