Ադրբեջանական Zerkalo թերթում հրապարակվել է ադրբեջանցի քաղաքագետ Ռաուֆ Միրկադիրովի «Թուրքիան սկսում է զայրացնել Ռուսաստանին» խորագրով հոդվածը, որում ասվում է.
«Թուրքիան Հարավային Կովկասի տարածաշրջանում իր գործողություններով սկսում է գնալով ավելի շատ զայրացնել Ռուսաստանին: Անկարան ամրապնդում է իր ռազմավարական հարաբերությունները Բաքվի ու Թբիլիսիի հետ՝ ըստ էության Մոսկվային հասկացնել տալով, որ նա տարածաշրջանի կարևոր խաղացողներից մեկն է, և որ ժամանակն է՝ Ռուսաստանը հաշտվի այդ իրողության հետ:
Ռուս-թուրքական ռազմավարական գործընկերությունն ավարտվեց՝ այդպես էլ չսկսված: Առաջին հերթին ուշադրության արժանի է այն, որ հենց Գաբալայում Թուրքիայի վարչապետն առաջին անգամ հրապարակավ քննադատեց ներսիրիական հակամարտության վերաբերյալ Ռուսաստանի դիրքորոշումը:
Դա մասնավորապես վերաբերում է Սիրիայում նախագահական ընտրությունների անցկացման անհրաժեշտության վերաբերյալ Մոսկվայի առաջարկին: Ընդ որում, Մոսկվան հայտարարել էր` եթե Բաշար Ասադը հաղթի այդ նախագահական ընտրություններում, ապա միջազգային հանրությունը պետք է հարգի Սիրիայի ժողովրդի ընտրությունը:
Մեկնաբանելով Մոսկվայի այդ նախաձեռնությունը՝ Էրդողանը զարմանք էր արտահայտել, թե ինչպես կարելի է Սիրիայում ընթացող քաղաքացիական պատերազմի պայմաններում անցկացնել արդար ընտրություններ: Ցայժմ Թուրքիայի վարչապետը խուսափել է Սիրիայի ներքաղաքական ճգնաժամի վերաբերյալ Ռուսաստանի դիրքորոշմանն ուղիղ ու միանշանակ գնահատական տալուց:
Ըստ էության, Էրդողանի այդ հայտարարությունը կարելի է համարել պաշտոնական Անկարայի ու Մոսկվայի միջև ռազմավարական գործընկերության փուլի ավարտ: Գործին չեն օգնում անգամ Էրդողանի ու Պուտինի միջև բարեկամական հարաբերությունները: Սակայն հարցը միայն Սիրիան չէ:
Այսօր Թուրքիան և Վրաստանը պատրաստվում են անցկացնել համատեղ ռազմածովային զորավարժություններ: Բաթումի ջրատարածությունում կայանալիք այդ զորավարժություններին մասնակցելու է Թուրքիայի առափնյա պաշտպանության TCSG-71 մոտորանավակը: Այստեղ կարևորն այդ զորավարժություններին թուրքական կողմից մասնակցող նավերի քանակը չէ, կարևորը բուն փաստն է»:
