Աղետի ենթարկված զբոսաշրջային Costa Concordia նավի ուղևորների տարհանումը սկսվել է նախատեսվածից 50 րոպե ուշ, ասվում է զբոսանավի «սև արկղի» ուսումնասիրությամբ զբաղվող մասնագետների եզրակացություններում:
Այս խախտման մեղքը ընկած է ոչ միայն նավի կապիտան Ֆրանչեսկո Սկետինոյի, այլև Costa Crociere ընկերության ճգնաժամային կենտրոնի ղեկավարի վրա, ում պատկանել է զբոսանավը:
Վերլուծությունը կազմում է հարյուրավոր էջեր ու 7 DVD-ձայնասկավառակ. փոխանցվել է Գրոսետտո քաղաքի դատարան: Այնտեղ պարունակվում է կապիտանի կամրջակի վրա բոլոր խոսակցությունները, նավահանգստին ուղարկված ամբողջ տեղեկատվությունը, կապիտանի ու մեքենայի բաժանմունքի միջև երկխոսությունը, տվյալներ երթուղու մասին:
Ansa գործակալությունը, հղում անելով մասանգետների եզրակացությանը, հաղորդում է, որ ուղևորների տարհանումը պետք է սկսվեր հունվարի 13-ին՝ ուղիղ ժ. 22.00-ին, սակայն Սկետինոն նավը լքելու հրաման է տվել ժ. 22.51-ին, իսկ տարհանումն սկսվել է դրանից 3 րոպե հետո:
Ընդ որում՝ Costa Concordia-ի նավապետը հասկացել էր, որ նավը կարող է խորտակվել արդեն ժ. 21.51-ին՝ խութերին նստելուց 6 րոպե անց:
Costa Concordia-ն աղետի է ենթարկվել հունվարի 14-ի գիշերը Տիրենեյան ծովում՝ Տոսկանայի Ջիլո կղզու մոտ:
