«Եվրոպական դիվանագիտությունը, այդ թվում և հունգարացիները, շատ լավ գիտեն հայկական հարցը»,-լրագրողների հետ հանդիպմանը ասաց քաղաքագետ Լևոն Շիրինյանը: Նրա խոսքերով՝ Հունգարիան Ավստրոհունգարական պետության ժառանգորդն է, որը մասնակցել է և՛Հայոց ցեղասպանությանը, և՛ Հոլոքոստին:
«Մենք անընդհատ ասում ենք՝եվրոպական արժեքներ, իսկ ով է ասել, որ այդ եվրոպական արժեքների մեջ չի կարող լինել մարդասպանություն»: Քաղաքագետի կարծիքով՝ այսօր կա պատերազմի հավանականություն, և Հայաստանը պարտավոր է ձեռնարկել որոշակի կանխարգելիչ միջոցներ, «որպես հայկական կողմ՝ պետք է համազգային մոբիլիզացիա անցկացնենք և հույսը դնենք սեփական ուժերի վրա: Հարկավոր է կազմակերպել նաև հայկական լոբբիստական կազմակերպությունների համագործակցություն:
Շատ կարևոր է նաև, որ տարածաշրջանում ունենանք ճանապարհներ, քանի որ փորձը ցույց է տվել, որ Վրաստանը չի կարող այդ ճանապարհները մեզ տրամադրել, պետք է արագացնենք Մեղրիի ճանապարհի շինարարությունը: Մասնագետը նշեց նաև՝ քանի որ չկա հստակ պատժամիջոց Ադրբեջանի վրա կիրառված, ապա խոսացողները կոկորդիլոսի արցունքներ են թափում:
Վերջում նա հավելեց. «Ես այս ամենը չեմ ասում խուճապ առաջացնելու համար, եթե պատրաստվենք վատթարին, կխուսափենք վատթարից»:
Անդրադառնալով Սիրիայում տեղի ունեցող դեպքերին՝ Լ. Շիրինյանն ասաց,որ քանի դեռ Սիրիայում իշխում է Ասադի ռեժիմը, մենք կունենանք ազատ գործողությունների հնարավորություն, հակառակ դեպքում Թուրքիան կակտիվանա, եթե Ասադի ռեժիմը տապալվի:
