Մեր այն դիտարկմանը, որ ավելի ճիշտ չէ՞ր լինի գազը թանկացնել ոչ թե 2012թ., որը նախընտրական շրջան է, այլ 2011թ.-ին` ԱԺ «Ժառանգություն» խմբակցության ղեկավար Ստյոպա Սաֆարյանը նկատեց. «2003թ.-ին նախընտրական շրջանից առաջ Ռոբերտ Քոչարյանը ռուսներին վաճառեց հեռախոսկապը և այլ կարևորագույն ձեռնարկություններ։ Ըստ էության, արդեն խոշոր տերությունների համար փորձարկված և իր արդյունավետությունը ապացուցած տեխնոլոգիա է դարձել նախընտրական շրջանում, օգտագործելով իշխանության թուլությունը, նրան դրդել նման գործարքների»։
Եվ քանի որ սա ևս նախընտրական շրջան է և խորհրդարանական ընտրությունները շուտով մեկնարկելու են, ավելին` խորհրդարանական ընտրությունները կանխորոշում են նախագահական ընտրությունների ելքը, բնականաբար 1 տարի է մնացել նախընտրական շրջանին, Ստյոպա Սաֆարյանի խոսքերով` արդեն և տարբեր անկյուններից կլսենք սպառնալիքներ, ինչպես Ղարաբաղի հարցով ենք լսում, որոնք իշխանությունները շատ լավ կարդում են որպես մեսիջ։
«Տեսեք, Ռուսաստանը գազի խնդիր է բարձրացնում, Սպիտակ տունը հայտարարում է, որ ամեն ինչ անելու է հայ-թուրքական հարաբերությունները առաջ տանելու համար։ Այսինքն` հերթական անգամ Հայաստանը հայտնվել է ամենատարբեր խոշոր երկրների կողմից ճնշումների դաշտում, և ՀՀ իշխանությունները հրաշալի հասկանում են որպես իրենց վերարտադրության հետ կապված գործարքների գնալու առաջարկ։