Գեներալ Մանվելի եղբորորդին` ՀՀԿ խմբակցության պատգամավոր Հրանտ Գրիգորյանը, ընդգրկված է Աժ գյուղատնտեսական և բնապահպանական հարցերի մշտական հանձնաժողովում: Aravot.am-ը երեկ նրանից փորձեց պարզել` ի՞նչ բնապահպանական, գյուղատնտեսական խնդիրներ կան ծառացած այսօր մեր երկրի առջև:
«Ի՞նչ գործ ունես բնապահպանությունից, կռիվ-մռիվ չի՞ եղել այսօր, դրանից գրի: Լսի, Վերահսկիչ պալատն ասում է` 900 մլն-ից 404 մլն-ը լափել են. փոխանակ դրանից գրես, եկել ես բնապահպանությունից ես հարցեր տալիս: Զաքարյան Իշխանը լիքը գող է գտել, գնա էդ գողերի մասին գրի: Գրի, թե ով է գողացել, ոնց են լափել»,- ի պատասխան` ասաց պարոն Գրիգորյանը:
«Առավոտ»-ի դիտարկմանը, որ Դուք իշխանության մաս եք կազմում, այդ մատնանշած գողերը կառավարության համակարգից են, Ձեր թիմի մասն են կազմում` նա պատասխանեց. «Ում թիմից ուզում է լինի, որ գող է` գող է: Ես քեզ խորհուրդ եմ տալիս, գնա տես` ովքեր են այղ գողերը, գնա անունները գրի, որ վաղը-մյուս օրը իրավապահները քո գրածով գնան, բռնեն գողի ձեռը»:
Թերթը հետաքրքրվեց նաև, թե հիմա ինչպե՞ս են հորեղբոր հետ նրա հարաբերությունները. «Դու գնա գողերի մասին գրի, թե չէ՝ հարցնում ես` հորողբորդ հետ ոնց ես: Ի՞նչ հորողբեր: Հորողբեր-մորողբեր չկա, եղունգ ունես` գլուխդ քորի»: Հրանտ Գրիգորյանը հորդորեց իր մասին լավ բաներ գրել, ինչը և անում ենք. արձանագրենք, որ պարոն Գրիգորյանն ապրում է առողջ ապրելակերպով: Աժ-ի նրա սենյակում, անմիջապես նրա գյխավերևում ծխելն արգելելու նշան է դրված, վրան էլ ավելացված` «Տուգանք` 15,000 դրամ»: Նա վստահեցրեց, որ ինքը չի ծխում, ծխողներին էլ տուգանում է. «Չեմ էլ ծխել, հերս չի թողել ծխեմ: Մի հատ լավ բան էլ մենք անենք, օրինակ` չծխենք»:
