ՀՅԴ խմբակցության քարտուղար և ՀՅԴ Գերագույն մարմնի փոխներկայացուցիչ Աղվան Վարդանյանին երեկ Aravot.am-ը հարցրեց, թե ՀՅԴ-ն չի՞ պատրաստվում միանալ ՀԱԿ-ի առաջարկին և կիսո՞ւմ է ՀԱԿ-ի մտահոգությունը, որ մեզ նման փոքր բյուջե ունեցող պետության համար շքեղություն է Աժ խմբակցություններին ու հանձնաժողովներին թանկարժեք Toyota Camry ավտոմեքենաներ հատկացնելը:
Աղվան Վարդանյանը պատասխանեց. «Ընդհանրապես նման ծրագրերը, նման ծախսերն ամբողջ պետության մակարդակով են արվում: Եթե խնդիր կա, ուրեմն դա պետք է վերաբերի ամբողջ պետական համակարգին, ոչ միայն Ազգային ժողովին: Այնպես որ` ես կարծում եմ, որ մասնակի նման առաջարկություններն ուղղակի ինչ-որ տեղ պոպուլիստական հնչեղություն ունեն: Խնդիրը պետք է կարգավորել համակարգային` ամբողջ պետության մակարդակով, ոչ թե մասնավոր դեպքերում»:
«Առավոտ»-ը հիշեցնում է, որ ՀԱԿ խմբակցության ղեկավար Լևոն Զուրաբյանը դիմել է Աժ նախագահ Հովիկ Աբրահամյանին` առաջարկելով ավելի էժան ավտոմեքենաներ հատկացնել խմբակցություններին և հանձնաժողովներին ու խնայողություն անել բյուջեի` նման սուղ պայմաններում:
