«Ես ավելի կողմնակից եմ Եվրոպայի հետ մեր կապերը խորացնելուն: Եվրասիական միությանը Թուրքիայի անդամակցության գործոնին կամ Թուրքիա-Ռուսաստան համագործակցությանը վատ չեմ նայում: Բայց Հայաստանի համար ավելի ճիշտ կլինի գնալ դեպի ԵՄ՝ պահպանելով Ռուսաստանի հետ հարաբերությունները»,- «Առաջին լրատվական»-ի հետ զրույցում նման տեսակետ հայտնեց ԱԺ ՀՀԿ խմբակցության պատգամավոր Գարեգին Նուշիկյանը՝ մեկնաբանելով թուրքական Hürriyet պարբերականում Մոսկվայի պետական համալսարանի սոցիոլոգիայի ֆակուլտետի պրոֆեսոր Ալեքսանդր Դուգինի տեսակետի հրապարակումը, ըստ որի՝ անցած 20 տարիների ընթացքում ռուսական հասարակությունում առկա գաղափարախոսական վակուումը կարող է լրացնել եվրասիականության նոր գաղափարախոսությունը: Դուգինի կարծիքով՝ այդ գաղափարախոսությունը ենթադրում է նախկին ԽՍՀՄ տարածքում «եվրասիական պետության» ձևավորում, որում կարող են ընդգրկվել ոչ միայն նախկին խորհրդային պետությունները, այլև Թուրքիան:
Հարցին՝ հնարավո՞ր է, որ Թուրքիան էլ ընդգրկվի Եվրասիական միության կազմում, Գ. Նուշիկյանը պատասխանեց, որ ամեն ինչ էլ քաղաքականության մեջ հնարավոր է, ու դա կլինի և՛ քաղաքական, և՛ տնտեսական շահերի արդյունքում: Նա հիշեցրեց, որ Թուրքիան և Ռուսաստանը զգալի ծավալների՝ ՀՀ-ՌԴ-ից անհամեմատ ավելի մեծ ապրանքաշրջանառություն ունեն:
