Այսօր հայտնի է դարձել, որ հրաժարական է տվել հյուսիսկովկասյան հանրապետություններից մեկի` Կարաչաևո-Չերկեսիայի նախագահ Բորիս Էբզեևը:
Պաշտոնական հաղորդագրության մեջ ասվում է, որ Էբզեևն ինքն է հրաժարվել պաշտոնից: Նրա հարաժարականի հրամանն արդեն ստորագրվել է Ռուսաստանի նախագահ Դմիտրի Մեդվեդևի կողմից: Այս մասին հաղորդում է РИА Новости գործակալությունը:
Տեղեկացնենք, որ վերջին 24 ժամվա ընթացքում սա արդեն երկրորդ հրաժարականն է նահանգային մակարդակում: Երեկ հրաժարական էր տվել նաև Կամչատկայի նահանգապետ Ալեքսեյ Կուզմիցկին: Ընդ որում` երկու ղեկավարներն էլ դեռ վերջերս էին նշանակվել այդ պաշտոններին և դեռ մի քանի տարի ունեին մինչև կավարտվեր իրենց պաշտոնավարման ժամկետը (Էբզեևը մինչև 2013թ., իսկ Կուզմիցկին` 2012թ.):
Թեպետ ձևական առումով նահանգապետերն իրենք էին հրաժարական ներկայացրել, սակայն Կրեմլին մոտ կանգնած աղբյուրները նշում են, որ սա Մեդվեդևի` գուբերնատորներին փոխելու և ավելի արդյունավետ կադրեր նշանակելու քաղաքականության շարունակությունն է: Որոշ փորձագետներ էլ նշում են, որ Մեդվեդևը աշխատանքից հեռացնում է Պուտինին մոտ կանգնած ղեկավարներին:
