Ստրասբուրգում մեկնարկելիք Եվրախորհրդարանի աշնանային նստաշրջանում կքննարկվի «Մագնիտսկու ցուցակի» օրենքի նախագիծը: Դրա էությունը հետևյալն է. այդ ցուցակի ռուս բարձրաստիճան պաշտոնյաներին կարգելվի մուտք գործել Եվրամիության տարածք և ԵՄ-ում տնօրինել ֆինանսական ակտիվներին:
Օրենքը, ամենայն հավանականությամբ, կընդունվի մինչև տարեվերջ: Այս մասին The New Times պարբերականին տված հարցազրույցում ասել է նախաձեռնության հեղինակներից մեկը՝ Եվրախորհրդարանի արտասահմանյան գործերով կոմիտեի անդամ, «Եվրոպայի լիբերալների և դեմոկրատների դաշինք» խմբակցության պատգամավոր Քրիստինա Օյուլանդը:
«Թե՛ Եվրոպայի, թե՛ ԱՄՆ-ի օրենսդիրները, անկասկած, մտադիր են «Մագնիտսկու ցուցակը» հետագայում ես առաջ տանել: ԱՄՆ Կոնգրեսի Ներկայացուցիչների պալատի արտասահմանյան գործերով կոմիտեն արդեն հավանության է արժանացրել համապատասխան օրենքը: Մեծ Բրիտանիայի ԱԳՆ-ն, որքան գիտեմ, Մոսկվայում բրիտանական դիվանագիտական ներկայացուցչության աշխատակիցներին խորհուրդ է տվել վիզաների տրամադրման ժամանակ ուշադրություն դարձնել այդ ցուցակի վրա»,- ասել է Քրիստինա Օյուլանդը Արկադի Սուխոլուցկու հետ հարցազրույցում :
Ռուսաստանը, ըստ նրա, ինքնիշխան պետություն է ու կարող է այդ նորությանը արձագանքել այնպես, ինչպես ճիշտ է համարում:
«Սակայն, ըստ մեզ, «Մագնիտսկու օրենքի» ստեղծման բոլոր հիմքերը կան: Բացի այդ՝ ԵՄ-ն դեռ չի տիրապետում այն տեղեկատվությանը, թե իրավական ինչ հիմքի վրա է Ռուսաստանը կազմելու ԱՄՆ-ի կամ ԵՄ-ի քաղաքացիների ինչ-որ պատասխան ցուցակ»,- ասել է Օյուլանդը՝ ի պատասխան Ռուսաստանի սպառնալիքների:
Նա ընդգծել է, որ «Մագնիտսկու օրենքը» տարածվելու է ոչ միայն այն պաշտոնատար անձանց վրա, որոնք ուղղակի կամ անուղղակի պատասխանատվություն են կրում Սերգեյ Մագնիտսկու մահվան համար, այլև բոլոր նրանց, ովքեր ուժային մեթոդներ են կիրառում ցույցերի խաղաղ մասնակիցների դեմ: «Այսպիսով` անգամ շարքային ոստիկանը կարող է հայտնվել «Մագնիտսկու օրենքում»:
Հարցին՝ արդյոք շա՞տ են «ցուցակի» կողմնակիցները Եվրախորհրդարանում, վերջինս պատասխանել է, որ նախաձեռնությանն աջակցում են բոլոր քաղաքական խմբերը:
«Կարծում եմ` ամփոփիչ քվեարկությունը Ստրասբուրգում տեղի կունենա հոկտեմբերին»,- ասել է նա:
