ԵԽԽՎ աշնանային նստաշրջանում, որը տեղի կունենա հոկտեմբերի 1-5-ը, հայկական պատվիրակությունը կբարձրացնի Ռամիլ Սաֆարովի արտահանձնման և Ադրբեջանի իշխանությունների կողմից արդարացման հարցը: ԵԽԽՎ-ում Հայաստանի պատվիրակության ներկայացուցիչ, ԱԺ ՀՅԴ խմբակցության անդամ Արմեն Ռուստամյանն օրերս ԵԽԽՎ մարդու իրավունքների և իրավական հարցերի հանձնաժողովի նիստում արդեն քվեարկության է դրել Վեհաժողովի լիագումար նիստում ադրբեջանա-հունգարական այս խայտառակ գործարքը քննարկելու հարցը: Հայ պատգամավորի այս առաջարկությունն ընդունվել է 20 կողմ, 7 դեմ ձայնով: Դեմ են քվեարկել թուրք և ադրբեջանցի պատվիրակները, ինչպես նաև ԵԽԽՎ-ում Ղարաբաղի հարցով ենթահանձնաժողովի նախագահ Ջորդի Խուգլա ի Կոստան: Իսկ Հունգարիայի պատվիրակը նիստին չի մասնակցել:
ԵԽԽՎ-ում Հայաստանի պատվիրակության ղեկավար Դավիթ Հարությունյանը «Առաջին լրատվական»-ի հետ զրույցում ասաց, որ հայկական պատվիրակության անդամները հարցը քննարկելեն և մտադիր են այդ մասին բարձրաձայնել ԵԽԽՎ-ում: Դավիթ Հարությունյանը չմանրամասնեց, թե ինչ տեսանկյունից է ներկայացվելու հարցը՝ պատճառաբանելով, թե նման քայլեր անելուց առաջ ընդունված չէ բարձրաձայնել այդ մասին: Նա միայն ընդգծեց, որ առաջնահերթությունը տրվելու է նրան, որ ներկայացվի, թե ինչ քայլի է գնացել Ադրբեջանը:
Դավիթ Հարությունյանի խոսքերից պարզ դարձավ, որ հարցը ԵԽԽՎ-ում ներկայացնելով՝ այնուամենայնիվ հայկական պատվիրակությունը որևէ լուրջ ակնկալիք չունի: «Քաղաքական հարց է բարձրացվում, որևէ ակնկալիք չկա: Սրանք քաղաքական հարցադրումներ են, որոնք նպատակ են հետապնդում ցույց տալ, թե ինչ քայլի է գնացել Ադրբեջանը, և որն է այդ երկրի իրական քաղաքականությունը»,- ասաց նա: Մեր այն դիտարկմանը, թե ինչո՞ւ չի շեշտվում այս գործարքում Հունգարիայի դերը՝ որպես եվրոպական արժեքները ոտնահարած և Ադրբեջանի հետ նման հանցավոր համաձայնության գնացած երկրի, Դավիթ Հարությունյանը պատասխանեց. «Դրա մասին էլ կարող ենք խոսել, իհարկե, բայց առաջնահերթությունն այլ է: Առաջնահերթ է Ադրբեջանի մասին խոսելը»: