Ռուսական Интерфакс լրատվական գործակալության փոխանցմամբ՝ Աբխազիայի նախագահ Ալեքսանդր Անկվաբն այսօր Սուխումում հանդիպել է Հայաստանում և Վրաստանում Նիդերլանդների դեսպան Յան Լանգերբերգի հետ:
Հանդիպման ժամանակ Անկվաբը քննադատել է հանրապետության հանդեպ ԵՄ-ի հռչակած քաղաքականությունը, որի կարգախոսն է «ներգրավում՝ առանց ճանաչման». «Աբխազիան որևէ տեղ ներգրավվելու կարիք չունի: «Ներգրավում՝ առանց ճանաչման» կարգախոսը բացարձակապես դատարկ է: Աբխազիայի հետ պետք է այլ հարաբերություններ հաստատել:
Մենք չենք շփվելու Թբիլիսիում հավատարմագրված եվրոպացի դիվանագետների հետ: Դրանից Աբխազիան չի տուժի: Մենք արդեն այլ ժամանակային չափման մեջ ենք: Ինձ թվում է, թե դա չեն հասկացել կամ էլ չեն ցանկանում խոստովանել մեզ մոտ ժամանող դիվանագետները:
Աբխազիայում միջազգային կառույցների ֆինանսական ընդհանուր գործունեությունը չի գերազանցում տարեկան 15 միլիոն դոլարը: Դա այն գումարը չէ, որը կարող է լրջորեն օգնել Աբխազիային: Վրաստանը պատերազմի ընթացքում վիթխարի վնաս է պատճառել մեզ: Խոսքը մոտ 14-15 միլիարդ դոլարի մասին է: Մենք լուրջ աջակցության կարիք ունենք, սակայն չենք ցանկանում, որ այդ աջակցությունը ցուցաբերվի նախապայմանների տեսքով»:
