Հայաստանում սեպտեմբերի 15-ին մեկնարկում է ՀԱՊԿ զորավարժությունը, որին մասնակցելու է մոտ 2000 մարդ` ՀԱՊԿ անդամ երկրների զորամիավորումներից: Հայաստանում տեղի են ունենալու ըստ էության աննախադեպ մասշտաբի զորավարժություններ, որտեղ կփորձարկվեն ՀԱՊԿ արագ արձագանքման ուժերը:
Զորավարժություններն անցկացվելու են մինչև սեպտեմբերի 19-ը: Դրանք տեղի էին ունենալու սեպտեմբերի 3-ից մինչև 8-ը, սակայն Հայաստանի խնդրանքով հետաձգվել են: Թեև ասվել էր, որ հետաձգումը տեխնիկական պատճառներով է, այսուհանդերձ` իրականում երևի թե բուն պատճառն այն էր, որ սեպտեմբերի 5-6-ին Երևան էր այցելում ՆԱՏՕ-ի գլխավոր քարտուղար Անդերս ֆոգ Ռասմուսենը: Իսկ մինչ այդ էլ տեղեկություններ կային, որ զորավարժությունների շրջանակում Հայաստան է այցելելու նաև ՌԴ նախագահ Պուտինը: Երևի թե Պուտինը չէր ցանկացել միաժամանակ ՆԱՏՕ-ի գլխավոր քարտուղարի հետ լինել Երևանում կամ տարածաշրջանում:
Սակայն մոտենում են զորավարժությունները, իսկ Պուտինի այցելության մասին կարծես թե մինչ օրս խոսք չկա: Բոլորին է հայտնի` երբ Պուտինը պետք է այցելի Հայաստան, մի քանի օր առաջ սկսում են ձեռնարկվել անվտանգության ակտիվ միջոցառումներ: Սակայն առ այսօր կարծես թե նման բան չկա, երևանյան դիտահորերը որևէ մեկը չի եռակցում, որ հանկարծ Պուտինի մեքենայի դիմաց որևէ մեկը հորից դուրս չգա: Որևէ այլ միջոցառումներ նույնպես չեն իրականացվում: Այս ամենը կասկածի տակ է դնում Պուտինի հայաստանյան այցը: Չկան նաև տեղեկատվական հրապարակումներ այցի մասին:
Մինչդեռ Երևանում Պուտինին քաղաքական շրջանակները սպասում էին երևի թե անհամբեր, որպեսզի նրա սեպտեմբերյան այցի ընթացքում հայաստանյան քաղաքական ուժերին տրվեին, այսպես ասած, ցուցումներ ու հանձնարարականներ: Պատահական չէ, որ նրանք հասարակությանը նախապատրաստում էին սեպտեմբերին` հայտարարելով, որ տեղի են ունենալու քաղաքական վերադասավորումներ: Բոլորը սպասում էին Պուտինի այցին ու մեսիջներին, և եթե այցը հանկարծ չկայանա, ապա մեծ է հավանականությունը, որ Հայաստանի քաղաքական ուժերը, համակարգչային լեզվով ասած՝ կկախվեն: Այդժամ հարկ կլինի «ռեսթարտ» անել հայաստանյան քաղաքական դաշտը, թեև կարծես թե թվում է, որ այդ դաշտի «պրոցեսորն» այնքան հին է արդեն, որ անգամ «ռեսթարտը» չի օգնի:
Իհարկե, դեռ ժամանակ կա, և բոլորն, անշուշտ, դեռ սպասում են նրան, սակայն այստեղ, հնարավոր է, որոշակի վերանայումներ են տեղի ունեցել օգոստոսի ընթացքում, երբ Սերժ Սարգսյանն ինքը ընդհատեց արձակուրդը ու մեկնեց Մոսկվա: Սպասվում էր, որ Պուտինի հետ այդ հանդիպումը կլինի բավական լարված, սակայն դրանից հետո հնչած հայտարարությունները բավական հանդարտ էին, ինչը վկայեց, որ, այդուհանդերձ, Պուտինը կարևոր հարցերի պատասխաններ ստացել է Սերժ Սարգսյանից և կարիք չունի սպասելու, թե երբ է գալու սեպտեմբերը:
Այնպեսոր` Հայաստանի քաղաքական դաշտում երևի թե պետք է մտածեն` ինչ անել, երբ չի գալիս սեպտեմբերը: Թեև, անշուշտ, պետք չէ կորցնել հույսը, որ Պուտինը կգա: Չէ՞ որ Հայաստանի քաղաքական դաշտի մեծ մասի հույսը նա է, ու հենց դրա համար էլ Հայաստանի հասարակությանը չարժե հույս դնել այդ դաշտի վրա:
