Դաշնակցությունն առաջարկում է ՀՀ-ում գազամատակարարման համակարգի գործունեությունն ուսումնասիրող ԱԺ ժամանակավոր հանձնաժողով ստեղծել:
ԱԺ ՀՅԴ խմբակցության պատգամավոր Արա Նռանյանը տեղեկացրեց, որ հանձնաժողովի նպատակն է լինելու «գնահատել գազամատակարարման գործող համակարգի սոցիալական, տնտեսական, իրավական և բնագավառի պետական կարգավորման համապատասխանությունը ՀՀ Սահմանադրության 31.1 և 33.1 հոդվածների, դրանց հիման վրա ընդունված ոլորտի օրենսդրական պահանջներին, բացի այդ` գնահատել բնագավառում ստեղծված իրավիճակի ազդեցությունը ՀՀ կայուն զարգացման հեռանկարների վրա»:
Արա Նռանյանն ասում է, որ իրենք առաջարկել են՝ ժամանակավոր հանձնաժողովին մաս կազմեն ԱԺ բոլոր խմբակցությունների ներկայացուցիչները: «Մենք համոզված ենք՝ այս խնդիրները մտահոգում են նաև քաղաքական մեծամասնության պատգամավորներին, որոնք, սակայն, ելնելով քաղաքական դրդապատճառներից, խուսափում են պրոբլեմների բացահայտումից»,- ասաց Նռանյանը:
Ինչ վերաբերում է ՀՅԴ առաջարկին կոալիցիոն մեծամասնության արձագաքին, թե նման հանձնաժողովի ստեղծումն անիմաստ է, Նռանյանը հակադարձեց, թե պետք է մի հիմնավորում բերեին՝ մերժելու համար, և միակ փաստարկը, որ կարողացել են գտնել՝ «անիմաստ» արտահայտությունն էր: