2012/13 մրցաշրջանի Չեմպիոնների լիգայի խաղարկությունում Իտալիան ներկայացված կլինի ընդամենը 3 ակումբով, փոխարենը` 4 թիմ կներկայացնի Գերմանիան:
DFL-ի հաղորդմամբ, անկախ այս մրցաշրջանի մնացած հանդիպումներից, Իտալիան ՈւԵՖԱ-ի դասակարգման ցանկում չի կարող հասնել Գերմանիային:
Վերոհիշյալ ցանկում առաջին հորիզոնականը զբաղեցնում է Անգլիան (82,928 մ.), երկրորդ տեղում Իսպանիան է (77,329 մ.), Գերմանիան ունի 68,103 միավոր, Իտալիան` 59,981: Եթե բոլոր իտալական ակումբները հաղթեն եվրագավաթների մնացած բոլոր հանդիպումները, միևնույն է, Գերմանիային հասնել չի հաջողվի:
Այսպիսով, 2012/13 մրցաշրջանում Գերմանիայի առաջնության 3 մրցանակակիրներն իրավունք կստանան խաղալ Չեմպիոնների լիգայի խմբային փուլում, իսկ չորրորդ տեղը զբաղեցրած թիմը կմասնակցի որակավորման փուլին: Իտալիան խմբային փուլին կներկայացնի երկու թիմ, իսկ երրորդ մրցանակակիրը կմասնակցի որակավորման փուլին: