Եթե Հայաստանի իշխանությունները ճանաչեն Ղարաբաղի անկախությունը, բանակցելու էլ ոչինչ չի մնա. այսօր լրագրողների հետ հանդիպմանը նման տեսակետ հայտնեց քաղաքագետ Մանվել Սարգսյանը:
Ըստ նրա՝ տարիներ շարունակ թեև ասվել է, որ Ղարաբաղի ստատուսը բանակցելու թեմա չէ, սակայն այս փուլում դա քննարկման հարց են դարձրել: Քաղաքագետի կարծիքով` այս իրավիճակն է ստեղծվել, որովհետև քաղաքական ուժերը ռեալ գնահատական չեն տալիս իրավիճակին, չեն վերլուծում, թե ինչ կտա Ղարաբաղի ճանաչումը, ի վերջո` ճանաչե՞լ, թե՞ չճանաչել: Արդյունքում տարիներ շարունակ այս իրավիճակն ավելի ու ավելի է մոտեցնում պատերազմի վերսկսմանը:
Ըստ Մանվել Սարգսյանի՝ Հայաստանի քաղաքական էլիտան Ռամիլ Սաֆարովի արտահանձնումը որակել է սադրանք՝ ուղղված Հայաստանի դեմ: Սակայն սա դեռ քննարկելու խնդիր է, թե ինչու է մարդկանց մեջ արմատացած այս հոգեբանությունը՝ ամեն մի գործողության մեջ սադրանք փնտրել Հայաստանի նկատմամբ:
Խոսելով խնդրի վերաբերյալ ԱԺ ընդունած հայտարարության մասին՝ Մանվել Սարգսյանը նշեց. «Մոտեցումը եղավ միասնական: Ամբողջ պառլամենտը մի փաստաթուղթ ծնեց, բայց կարծես Թուրքմենստանում էր գրվել այդ փաստաթուղթը»:
Նա նշեց, որ Ադրբեջանի պահվածքում ինքը արտառոց ոչինչ չտեսավ: Այդ երկիրը միշտ փորձել է աշխարհին պարտադրել ի մոտեցումները և ցանկացած ճանապարհով հասնել իր ուզածին:
«Հիմա Ադրբեջանը դժվար թե հրաժարվի այս քաղաքականությունից և ուրիշ պատկերացումներ որդեգրի, դժվար թե աշխարհի հետ հարաբերվի ուրիշ լեզվով»,- ընդգծեց բանախոսը:
Քաղաքագետ Ալեքսանդր Մարկարովը նշեց, որ Ադրբեջանի պետական քաղաքականության հիմքում ընկած է ատելությունը: Ըստ նրա՝ ոճրագործի հերոսացումը ցույց տվեց, թե ինչ խեղված հոգեբանություն ունի Ադրբեջանը:
ՆԱՏՕ-ի գլխավոր քարտուղարի այցը Հայաստան, ըստ Մարկարովի, առաջին հերթին փաստում է, որ շարունակվում է ՆԱՏՕ-ի համագործակցությունը Հայաստանի հետ: Երկրորդ` սա փաստում է, որ ՆԱՏՕ-ն իր մտահոգությունն է հայտնում Սաֆարովի գործի վերաբերյալ: Երրորդ` սա ապացուցում է, որ ՆԱՏՕ-ն չի տեսնում ԼՂ հիմնախնդրի՝ ռազմական ճանապարհով լուծում:
