Այսօր կայացած ԱԺ նիստում անկախ պատգամավոր Էդմոն Մարուքյանը, անդրադառնալով պատգամավորների՝ մեկից ավելի հանձնաժողովներում ընդգրկված լինելու հարցին, մտահոգություն հայտնեց, որ ինքը, որպես անկախ պատգամավոր, փաստորեն չի կարող մասնակցել մի քանի հանձնաժողովների աշխատանքներին` ինչպես իր գործընկերները:
«Փոփոխությունը վերաբերում է միայն խմբակցությունների պատգամավորներին: Սա նշանակում է, որ վաղը, եթե պատգամավորը այլևս խմբակցության մեջ ներգրավված չլինի, նա կբախվի նույն խնդրին, ինչ ես այսօր բարձրաձայնում եմ: Սակայն ամեն դեպքում ես կողմ եմ քվեարկելու օրինագծին,- ասաց նա:
ԱԺ նախագահը պետաիրավական հարցերի հանձնաժողովի նախագահ Դավիթ Հարությունյանին առաջարկեց հաշվի առնել Է. Մարուքյանի մտահոգությունը, որպեսզի մեկից ավելի հանձնաժողովներում աշխատելու իրավունքը տարածվի նաև անկախ պատգամավորների վրա:
