ՌԴ նախագահ Վլադիմիր Պուտինը պատասխանել է կռունկների երամն առաջնոդելու վերաբերյալ նրա հասցեին համացանցում տարածված խայթող մեկնաբանություններին:
Ասիա-խաղաղօվկիանոսյան համագործակցության գագաթնաժողովի արդյունքների վերաբերյալ մամլո ասուլիսի ժամանակ նախագահին հարց են տվել կռունկներին ուղեկցելու ակցիայի վերաբերյալ: Լրագրողը հետաքրքրվել է համացանցում տարածված մեկնաբանությունների վերաբերյալ նախագահի վերաբերմունքին` ուշադրություն դարձնելով այդ արշավը ընտրական վիճակագրության դիտանկյունից ներկայացնելու Քսենյա Սոբչակի արտահայտություններին:
Նա նշել է, որ կռունկների 63 տոկոսը թռել է Պուտինի հետևից, մնացածը նախընտրել են թռչել հարավ, և միայն մի փոքր մասն է մնացել` բույն կառուցելու հրապարակներում և բուլվարներում: Այս մասին հաղորդում է Взгляд-ը:
«Իսկապես, ոչ բոլոր կռունկներն են միանգամից թռել, չեն թռել միայն թույլ կռունկները: Առաջին կամ երկրորդ փորձից բոլորն էլ թռել են»,- պատասխանել է Պուտինը:
Նա ավելացրել է. «Ազնվորեն պետք է ասեմ, որ դրանում առկա է նաև առաջնորդ-օդաչուի մեղքը` չափազանց արագ բարձրություն և արագություն հավաքելու համար, ինչին հետևել բոլոր կռունկները չեն կարողացել: Պարզապես որոշակի պահերի, նկատի ունեմ եղանակային վատ պայմանները՝ այդ թվում քամին, օդաչուն ստիպված է հապճեպ զարգացնել արագությունն ու բարձրությունը, այլապես համակարգը կարող է խափանվել»:
Նրա խոսքով` «կան, իհարկե՛, թռչուններ, որոնք երամով ընդհանրապես չեն թռչում, նախընտրում են բույն հյուսել ինչ-որ առանձին տեղ»: «Ի՞նչ արած, դա այլ խնդիր է, սակայն նույնիսկ եթե նրանք երամի անդամ չեն, միևնույն է, նրանք մեր պոպուլյացիայի անդամներն են, և նրանց պետք է վերաբերվել զգուշավորությամբ»,-ասել է Պուտինը:
Խոսելով մեկնաբանություններից` Պուտինը հայտնել է. «Ի՞նչ ասեմ. ինքներդ թռչեիք»:
Ինչպես ավելի վաղ տեղեկացրել էինք, Ասիա-խաղաղօվկիանոսյան տնտեսական համագործակցության գագաթնաժողովի նախօրեին Ռուսաստանի նախագահ Վլադիմիր Պուտինն այցելել է Յամալ, մասնակցել «Հույսի թռիչք» նախագծին՝ ուղղված սպիտակ կռունկների պահպանմանը:
Ինչպես հաղորդում է «Վզգլյադ»-ը, Պուտինը մասնակցել է գիտահետազոտական խմբի փորձերից մեկին, որի նպատակը եղել է բուծարանի կռունկներին ցույց տալ իրենց թռիչքի ուղղությունը: Դելտապլանով, որը կռունկներն ընդունում են որպես իրենց առաջնորդ, Պուտինը երեք թռիչք է իրականացրել՝ մեկը ճանաչողական, երկուսը՝ թռչունների հետ:
Առաջին անգամ Պուտինի թռիչքի ուղղությանը հետևել է միայն մեկ կռունկ: Երկրորդ թռիչքը բարեհաջող է ավարտվել. Պուտինին հետևել է 5 կռունկ, չնայած մի քանի պտույտից հետո մնացել են միայն երկուսը:
