Անպտղության բարձր ցուցանիշի շնորհիվ ապագայում ՀՀ բնակչության թիվը երկու անգամ կնվազի: Այս մասին այսօր լրագրողների հետ հանդիպման ժամանակ ասաց «Սերթիլիթի սենթր» մարդու անպտղության կենտրոնի տնօրեն Էդուարդ Համբարձումյանը՝ խոսելով վերարտադրողական առողջության կարևորության շուրջ:
Է. Համբարձումյանը հիշեցրեց, որ մարդու սեռական առողջությունը ոչ միայն ֆիզիկական, հոգեբանական առողջությունն է, այլև մարդու իրավունքներից մեկն է, ամենակարևորագույն իրավունքներից մեկը: Մի քանի տարի առաջ եվրախորհրդարանը զույգերի վերարտադրողական առողջության մասին իրավունք մտցրեց: «Անպտղությունը բարձր տոկոս է կազմում և դեմոգրաֆիկ խնդիր է դառնում: Այն երկրներում, որտեղ տասնհինգ տոկոսից բարձր է, ազգային խնդիր է, Հայաստանն այսօր ինքն իրեն վերարտադրելու խնդիր ունի, անպտղության բարձր տոկոսի պատճառով Հայաստանի բնակչությունը երկու անգամ կնվազի: Անպտղությունը երկու հոգու խնդիր չէ, մեր ազգաբնակչության խնդիրների հետ է կապված: Ասում էին, որ այս խնդիրը կանանց է վերաբերում, սա հավասար է բաժանված: Սա երկուսի խնդիր է»,- մեկնաբանեց մասնագետը՝ շարունակելով, որ նույնիսկ վերջին տարիներին տղամարդկանց անպտղության միտումը բարձրանում է:
Անդրադառնալով սուրոգատ մայրությանը՝ նա ասաց, որ այն բուժական վերջին խոսքերից մեկն է, որն ամբողջ աշխարհում ընդունված պրակտիկա է: «Նույնիսկ Աբրահամին Սառան չէր կարողացել երեխա պարգևել, դիմել էին սուրոգատ մայրությանը: Սա կարևորագույն ինստիտուտ է»,- նկատեց բանախոսը:
